Bilim jáne ǵylym mınıstri Asqat Aımaǵambetovtiń facebook paraqshasynda ustazdarǵa jazǵan haty jarıalandy.
– Qymbatty áriptesim! Mine, barshamyz úshin qıyn ári erekshe bolǵan oqý jyly da óz máresine jetti. Bul oqý jyly aıanbaı qyzmet etken ár muǵalimniń eren eńbegimen jáne erligimen esimizde qalary sózsiz. Mektepterge múldem jańa oqytý ádisterine kóshý ońaıǵa soqpaǵanyn bári birdeı túsine bermeıdi. Ókinishke qaraı, biz dástúrli oqytý formatyna tolyqtaı kóshe almadyq. Pandemıanyń saldary bilim berý júıesine áli de áser etetini anyq. Degenmen siz barlyq qıyndyq pen syn-tegeýrinderge qaramastan, sabaqtaryńyzdy utymdy uıymdastyryp, múmkindiginshe jaqsy nátıje kórsete aldyńyz. Siz ustaz mamandyǵynyń sezimtaldyq, balalarǵa degen qamqorlyq jáne adamgershilik syndy eń jaqsy qasıetterin tanytýdyń jarqyn úlgisine aınaldyńyz, – dep jazdy mınıstr.
Onyń aıtýynsha, jumsalǵan kúsh-jigerge qaramastan, qashyqtan oqytý kezinde ártúrli sebepterge baılanysty artta qalǵan balalardyń bilimderi men basqa oqýshylardyń bilim deńgeıin salystyrǵanda alshaqtyq baıqalady.
– Bul jaǵdaıdyń oryn alǵanyna balalar kináli me? Árıne, balalardyń esh kinási joq. Olar dástúrli formatta bilim alsa, sizdiń qoldaýyńyzdy sezinip, ózderin kórsete alar edi dep senemin. Olarǵa bul olqylyqtardyń ornyn toltyrý úshin múmkindik berýimiz kerek pe? Álbette. Men, sizdiń áriptesińiz retinde, mamandyǵymyzǵa tán qasıet – izgilikke umtylyp, shákirtterińizge kómek qolyn sozýyńyzdy suraımyn.
Jigerli ári alǵyr mektep oqýshylarymen jumys isteý ońaıyraq. Degenmen pandemıaǵa baılanysty oqý baǵdarlamasynan qalyp qoıǵan oqýshylarmen jumys jasaý ońaı emes. Oqýshylardyń bilimi boıynsha artta qalýy olardyń múmkindikteri sondaı degen sóz emes. Bilim berýdegi olqylyqtardy qıyn jaǵdaı men oqýshylardy jigerlendirý deńgeıiniń jetkiliksizdigimen sıpattaýǵa bolady. Mundaı balalar qazir barlyq nazarymyzdy qajet etedi. Olardyń áleýeti zor. Sondyqtan balalarymyzǵa qoldaý kórsetýimiz kerek. Búldirshinderimizdi óz qamqorlyǵyńyzǵa alyp, qıyndyqtarǵa qaramastan olqylyqtardyń ornyn qosymsha sabaqtar ótkizý arqyly toltyrasyzdar dep úmittenemin. Meniń bul ótinishimdi qabyl alýyńyzdy suraımyn, – dedi vedomstvo basshysy.
Sonymen qatar mınıstr Aımaǵambetov muǵalimderdi jazǵy mektepterdiń jumysyna 26 mamyr – 20 maýsym aralyǵynda belsene qatysýǵa shaqyrdy.
– Osy jyly sońǵy qońyraý merekesinde erekshe sezimge bólengenińizdi bilemin. Óıtkeni bir jaǵynan oqý jyly aıaqtalyp jatsa, ekinshi jaǵynan – jazǵy mektepter jumys isteı bastady. Biz mundaı jaǵdaıdyń qaıtalanbaýy úshin qoldan kelgenniń bárin jasaıtyn bolamyz. Qashyqtan bilim berý kezinde áriptesterim áleýmettik jelilerdi belsendi ári erkin meńgere bastap, óz sabaqtaryna oıyn elementterin engize bastaǵanyn erekshe atap ótkim keledi. Biz, árıne, osyndaı kásipqoı mamandarymyzdy únemi qoldap, olardy basqalar úshin úlgi etemiz. Bul úrdis umytylmaı, kerisinshe, odan da úlken áserge ıe bolady dep úmittenemin.
Oqýshylarǵa tárbıe berý máselesi muǵalim jumysynda óte mańyzdy, sol sebepti bul baǵytta ata-analarmen birlese jumys jasalýy tıis. Siz balamen onyń janynda otbasy men jaqyndary bolmaıtyn bóten ortada jumys jasap, oqýshynyń boıynda bolýy múmkin problemalary týraly ata-analaryna der kezinde aıta alasyz. Bala otbasynda da, mektepte de oǵan basa nazar aýdarylatynyn sezinýi kerek. Buǵan tek ata-analarmen tyǵyz baılanysta, olarmen teń jáne seriktestik qarym-qatynas qurý arqyly qol jetkizýge bolady, – dep jazdy Aımaǵambetov.
Mınıstr muǵalimderge balalarmen qarym-qatynasta eskerý kerek dúnıelerdi atap aıtty.
– Balalardyń qyzyǵýshylyǵyn oıatyp, olardy qatelikteri úshin aıyptamańyz. Kerisinshe, oryn alǵan qatelikterin túzetýge kómektesińiz. Sońy sáttilikke ulaspaǵan áreketterinen keıin úmit pen senimdi joǵaltpaýǵa úıretińiz. Balalar ózgeshe oılap, óz pikirin bildirgenderi úshin olardyń upaılaryn tómendetpeńiz.
Qazir balalarymyz olarǵa barynsha túsinistikpen qaraǵanymyzdy asa qajet etedi. Olarǵa mahabbat pen qamqorlyq qajet. Biz búldirshinderimizdiń mektepke baryp, bilim alǵandaryn qalaımyz. Sonymen qatar balalarymyzdy basqalarmen salystyrǵanymyzdy toqtatý kerek.
Pandemıa jaǵdaıy muǵalimniń basty qyzmeti tek aqparat berý emes, sondaı-aq onyń basqa da mindetterin aıqyndap berdi. Atap aıtsaq, balalarǵa qoldaý kórsetý, janashyrlyq tanytý, olardy yntalandyrý, kómek qolyn sozyp, tálimger bolý. Búginginiń balalary múldem ózgeshe, olar ózderin erkin ustaıdy. Endigi kezekte olardyń boılaryndaǵy jaqsy qasıetterdi saqtap, odan ári damytý - bizdiń basty mindetimiz, – dedi ol.
Mınıstr hatynyń sońynda vaksınasıa naýqanynda belsendi azamattyq ustanym tanytyp, vaksınasıa týraly ǵylymı derekterdi taratý barysynda kómek kórsetýdi surady. Sondaı-aq atalǵan taqyryp aıasyndaǵy jalǵan aqparatpen kúresýge shaqyrdy.
Pikir qaldyrý