Búgin Ál-Farabı atyndaǵy qalalyq ǵylymı-ámbebap kitaphanasynda «Shymkent qalasynyń ensıklopedıasy» qamtıtyn málimetterdi saralaý jıyny ótti. Basqosýǵa Shymkent qalalyq máslıhatynyń hatshysy B.Narymbetov, jazýshy M.Ábdákimuly jáne zıaly qaýym ókilderi qatysty.

— Árbir respýblıkalyq mańyzy bar qalanyń tarıhyn, ondaǵy tulǵalar men tarıhı-tanymdyq málimetterdi toptastyryp, bútin bir ensıklopedıa etip shyǵarý óte durys bastama. Biz bul ensıklopedıaǵa qalanyń tarıhyn, Shymkentti basqarǵan jáne túrli salada eńbek etken tanymal tulǵalardy, ǵalymdardy, óner adamdaryn jáne ózge de qundy derekterdi engizýdi josparlap otyrmyz, – dedi B.Narymbetov.
Máslıhat hatshysynyń aıtýynsha, ensıklopedıa qala ákimdiginiń qarjylandyrýymen mamyr aıynyń sońynda jaryq kórmek. Al, kitaptyń tusaýkeseri qala kúnine josparlanyp otyr.

Ensıklopedıany qurastyrýshy redaktor, jazýshy M. Ábdákimuly jıyn barysynda uıymdastyrý jáne redaksıa alqasymen tanystyryp ótti. Aqyldastar alqasyna Shymkent qalasy ákimi M. Áıtenovten bastap, qaladaǵy basqarma, mýzeı, arhıv jáne mádenıet oshaqtarynyń basshylary kirgen. Al redaksıa alqasynda osy jumysty úılestirip, toptastyratyn jýrnalıser men ǵalymdar bar.

— Barshaǵa belgili jyl basynda «Shymkent qalasynyń tarıhy» jaryq kórgen-di. Endi ensıklopedıany qurastyrýǵa kirisip kettik. Jospar boıynsha ensıklopedıa qala tarıhynan bastalady. Tarıhty kezeń-kezeńimen bergen soń, ózge málimetter alfavıttik negizde usynylmaq. Qala tarıhy, ony basqarǵan tulǵalardyń qysqasha ómirbaıany, ǵalymdar, Sosıalısik eńbek erleri, óner adamdary, óndiris oryndary, mádenı oshaqtar, barlyǵyn qamtýdy kózdep otyrmyz. Tipti, qalanyń órkendeýine úles qosqan qurmetti azamattardyń tizimin engizetin bolamyz, – dedi M. Ábdákimuly.

Jıyn barysynda uıymdastyrý alqasynyń músheleri óz salalaryna qatysty oı-pikirlerin aıtyp, usynystaryn ortaǵa saldy.

Zamıra Aldabergenova