Astanada 24 jastaǵy er adam Mınıstrlikter úıiniń kireberisteriniń birinde órt qoıýǵa áreket jasaǵan.
Áleýmettik jelilerde órt qoıý áreketinen keıingi jaǵdaıdyń vıdeosy paıda boldy. Shabýyl jasaǵan adam kireberistegi týrnıketke janǵysh qospany laqtyrǵan.
"Belgisiz er adam ǵımaratqa kirip, janǵysh qospany týrnıketke laqtyrǵan. Saldarynan shamamen 2 sharshy metr aýmaqta órt shyqty. Qutqarýshylardyń úılesimdi is-qımyldarynyń arqasynda órt sóndirgishtiń kómegimen tolyǵymen joıyldy", - deıdi Astana qalalyq tótenshe jaǵdaılar departamenti.
Oqıǵa kezinde eshkim zardap shekpedi.
"Mınıstrlikter úıiniń kireberisin órtep jibergen 24 jastaǵy azamatty anyqtap, ustady. Qazirgi ýaqytta sotqa deıingi tergeý bastaldy. Bolǵan oqıǵanyń barlyq jaǵdaılary anyqtalatyn bolady", - deıdi qalalyq polısıa departamentiniń baspasóz qyzmeti.
