Qasym-Jomart Toqaev Donald Tramptyń Qazaqstannan ımporttalatyn taýarlarǵa baj salyǵyn salý týraly hatyna jaýap joldady, Qamshy.kz aqparattyq agenttigi.
Memleket basshysy Qazaqstan Amerıka Qurama Shtattarynyń burynnan kele jatqan senimdi saýda ári ınvestısıalyq seriktesi retinde ádil, túsinikti jáne ózara tıimdi saýda baılanystaryn damytýǵa beıildiligin atap ótti.
"Qazaqstan Prezıdenti saýda máseleleri boıynsha rasıonaldy sheshim ázirleý maqsatynda elimizdiń konstrýktıvti dıalogty jalǵastyrýǵa daıyn ekenin jetkizdi. Qasym-Jomart Toqaev saýda problemasyna qatysty ortaq mámilege qol jetkizýge bolatynyna senim bildirdi", - dep jazylǵan habarlamada.
Buǵan deıin AQSH prezıdenti Donald Tramp 2025 jyldyń 1 tamyzynan bastap Qazaqstannan jetkiziletin barlyq taýarlarǵa 25 paıyzdyq baj salyǵyn engizetinin jarıalady. Tramptyń aıtýynsha, bul sheshim Qazaqstanmen aradaǵy «uzaq merzimdi jáne turaqty saýda tapshylyǵy» saldarynan qabyldanǵan. Qasym-Jomart Toqaevtyń atyna joldanǵan hatynda AQSH basshysy kópjyldyq kelissózderge qaramastan, «ekijaqty qatynastardyń birjaqty kúıinde qalyp otyrǵanyn» atap ótken.
