"Altyn Orda" bazarynyń burynǵy basshylary Qanat Almabek pen Danıar Ábdiǵaparovqa izdeý jarıalandy. Ekeýi de 2025 jylǵy 23 mamyrdan bastap izdeýde.

QR İshki ister mınıstrliginiń dereginshe, Qanat Almabek — 1984 jylǵy 10 sáýirde týǵan, Qazaqstan azamaty, ulty — qazaq. İzdeý isi Almaty oblysy boıynsha tirkelgen. İzdeýdi bastaǵan organ — İİM, al tikeleı izdestirý sharalaryn Qarasaı aýdandyq polısıa basqarmasy júrgizýde.

Sol sekildi, Danıar Amalbekuly Ábdiǵaparov — 1982 jylǵy 1 naýryzda týǵan, Qazaqstan azamaty. Ol da úsh kúnnen beri izdeýde. İzdeý Almaty oblysy boıynsha tirkelip, izdestirýdi Qarasaı aýdanynyń polısıasy júrgizip jatyr.

Eki azamatqa qatysty quqyq qorǵaý organdary asa iri kólemde alaıaqtyq jasady degen kúdikpen tergeý júrgizip jatyr. Olardyń qylmystyq top quramynda áreket etkeni, sondaı-aq “Altyn Orda” bazaryndaǵy saýda núktelerin reıderlik jolmen tartyp alý, jemqorlyq jáne múliktik alaıaqtyq faktilerine qatysy bolýy múmkin ekeni aıtylýda.

Aıta keteıik, “Altyn Orda” bazary — Almaty men Almaty oblysy arasyndaǵy eń iri saýda habtarynyń biri. Bul bazar tóńiregindegi uzaqqa sozylǵan yqpal úshin kúres quqyq qorǵaý organdarynyń nazarynda kele jatyr.