Ermurat Bapı: Toqaev úlken eldiń bir aımaǵyn basqaryp otyrǵan joq

/uploads/thumbnail/20250709110846782_big.webp

QR Parlamenti Májilisiniń depýtaty Ermurat Bapı elimizde jıi aıtylatyn «Prezıdent ishki máselelerdi ysyryp qoıyp, syrtqy saıasatqa kóbirek kóńil bóledi» degen pikirlerdi synǵa aldy. Onyń aıtýynsha, mundaı ýájder bılik júıesiniń qalaı jumys isteıtinin tolyq túsinbeıtinderdiń sózi.

«Qazirgi álem alasapyran jaǵdaıdy bastan keship jatyr. Jahandyq saıasat kún saıyn qubylady. AQSH pen Qytaı arasyndaǵy strategıalyq turǵyda báseke kúsheıdi. Taıaý Shyǵysta jaǵdaı ýshyǵyp tur. Reseıge salynǵan álemdik sanksıalardyń salqyny kórshi elderge tıip jatyr. Osyndaı qıyn zamanda syrtqy saıasat – el qaýipsizdigin qamtamasyz etýdiń birden-bir tetigi», - deıdi depýtat.

Ermurat Bapı Qazaqstannyń geosaıası ornyn da eske saldy:

«Biz eki alpaýyt – Reseı men Qytaıdyń arasynda ornalasqan elmiz. Álem boıynsha 9orynda turǵan ulan-ǵaıyr jerimiz, baı tabıǵı resýrsymyz bar. Al halqy – salystyrmaly túrde az memleketpiz. Iaǵnı, Qazaqstan – geosaıası turǵyda óte mańyzdy, báriniń nazarynda turǵan memleket. Sondyqtan Prezıdenttiń sheteldermen teń dárejede salıqaly ári belsendi qarym-qatynas júrgizýi – táýelsizdigimiz ben tynyshtyǵymyzdyń kepili», - deıdi májilismen.

Maqalada ol Qasym-Jomart Toqaevtyń belsendi syrtqy saıasatymen qatar, ishki reformalar men áleýmettik máselelerdi de qatar alyp júrgenin naqty derektermen kórsetken. Mysaly, sońǵy eki aıda Prezıdent 18 resmı is-sharaǵa qatysyp, 23 adamdy qabyldap, 31 zańǵa qol qoıyp, óńirlerdi aralap, halyqpen kezdesken. Sonymen qatar, osy aralyqta tórt ret shetelge sapar jasap, úsh halyqaralyq samıtke qatysyp, ondaǵan mańyzdy qujattarǵa qol qoıǵan.

«Toqaev úlken eldiń bir aımaǵyn basqaryp otyrǵan joq, ol – geosaıası ahýal myń qubylǵan zamanda táýelsiz memlekettiń qaýipsizdigin, egemendigi men aýmaqtyq tutastyǵyn saqtaýǵa jaýapty tulǵa. Ony belsendi, pragmatıkalyq jáne sarabdal syrtqy saıasatsyz jasaý múmkin emes. Árbir halyqaralyq kezdesý, ár samıt, Prezıdenttiń saparlary – osy basty múddelerdi qorǵaýǵa baǵyttalǵan qadamdary. Qıyn kezeńde ol irgeles eldermen de, Eýroodaq múshelerimen de, Islam – arab álemimen, túrki memleketterimen, tipti alys Amerıka Qurama Shtattarymen de turaqty ári ózara tıimdi qarym-qatynasty saqtap otyr. Dál qazir de jáne bolashaqta da bizge osyndaı basshy qajet», - dep túıindeıdi Ermurat Bapı.

Qatysty Maqalalar