Qazaqstanda shilde aıynyń alǵashqy jeksenbisi — Ulttyq dombyra kúni retinde atalyp ótedi. Bıyl bul mereke 6 shildege sáıkes kelip otyr. Dombyra kúni 2018 jyly  prezıdent jarlyǵymen bekitilgen.

Jyl saıyn ár óńirde dombyra kúnine baılanysty túrli sharalar uıymdastyrylady. Alaıda ulttyq aspap retinde dombyrany ushaqqa qol júgi retinde alý múmkin bolmaı otyr. Buǵan qatysty qoǵam belsendileri únemi óz narazylyǵyn bildirip, dombyrany ushaq salonyna emin-erkin alyp kirýge qatysty arnaıy zań qabyldanýyn usynýda. 

Buǵan deıin bul másele Májiliste de kóterildi. Depýtat Rınat Zaıytov  ulttyq aspaptardy ushaqqa kirgizýge ruqsat etilý kerek dep esepteıtinin jetkizdi. 

"Qazir áýe kompanıalarynda qazaqtyń ulttyq aspaptaryna qarsy bir ádeıi josparlanǵan nárse sıaqty júrip jatyr. "Naǵyz qazaq – qazaq emes, naǵyz qazaq – dombyra" dep Qadyr Myrzalıev aıtpaqshy, bul bizdiń memleketimizdiń aınasy. Áýe kompanıalaryńyzǵa duǵaı sálem aıtyńyz. Osy máseleni sheship berińizder. Qazaqtyń saýsaqqa tolmastaı 4-5 ulttyq aspaby bar. Sol aspaptar ushaqqa kirgizýge ruqsat alsyn", dedi depýtat. 

Qamshy.kz aqparattyq agenttigi osyǵan qatysty oqyrman arasynda saýalnama jasaýdy jón kórdi. Al siz qalaı oılaısyz, dombyrany ushaq salonyna alyp kirýdi zańdastyrý qajet pe?