Májilis kýlýarynda eńbek jáne halyqty áleýmettik qorǵaý mınıstri Svetlana Jaqypova eń tómengi jalaqyny kóterý jóninde pikir bildirdi.
Mınıstrdiń aıtýynsha, bul másele kún tártibinde tur. 2024 jyly alǵash ret eń tómengi jalaqyny esepteýdiń jańa ádistemesi qabyldanǵan. Qazirgi ýaqytta úsh ǵylymı-zertteý ınstıtýty eńbek ónimdiligi, óńirlik jáne salalyq medıanalyq jalaqy kórsetkishteri boıynsha zertteý júrgizip jatyr. Bul derekter eń tómengi jalaqy mólsherin esepteýge negiz bolady.
– "Biz ádistemeni qabyldadyq. Qazir naqty taldaý júrip jatyr. Sonyń nátıjesinde eń tómengi jalaqy mólsheri anyqtalady. Eger zertteý nátıjeleri oń bolsa, eń tómengi jalaqy 2026 jyldyń 1 qańtarynan bastap kóterilýi múmkin", – dedi mınıstr.
Mınıstrlik buǵan deıin Dúnıejúzilik bank sarapshylarymen birlesip, ádisteme jobasyn ázirlegen bolatyn.
Aıta keteıik, Halyqaralyq eńbek uıymy elderge Keıts ındeksin qoldanýdy usynady. Bul ındeks boıynsha eń tómengi jalaqy medıanalyq jalaqynyń keminde 50%-yna teń bolýy tıis. Damyǵan elderde bul kórsetkish orta eseppen 55%-dy quraıdy. Al Qazaqstanda 2023 jyly Keıts ındeksi nebári 34% deńgeıinde bolǵan.
