Qazaqstanda jolaýshylar poıyzdaryn beınebaqylaý júıesimen jabdyqtaý qarqyndy júrgizilip jatyr. Qazirgi ýaqytta tórt myńǵa jýyq beınekamera ornatylǵan. Jyl sońyna deıin el ishindegi barlyq 112 baǵyttaǵy poıyz tolyq beınebaqylaýmen qamtylmaq.
Mamandardyń aıtýynsha, poıyzdardaǵy kameralardan túsetin beınematerıaldar naqty ýaqyt rejıminde arnaıy sıtýasıalyq ortalyqta baqylanady. Bul standartty emes jaǵdaılarǵa jedel áreket etýge múmkindik beredi. Sonymen qatar, beınejazbalar jolaýshylardyń umyt qaldyrǵan zattaryn tabýǵa da kómektesedi.
"Qazaqstan temir joly" kompanıasynyń málimetinshe, beınebaqylaý júıesin engizgeli beri poıyzdardaǵy quqyqbuzýshylyqtar sany 21%-ǵa, al jolaýshylar tarapynan kelip túsetin shaǵymdar úshten birine azaıǵan. Umyt qalǵan zattardyń árbir toǵyzynshysy ıesine qaıtarylǵan.
– "Beıneanalıtıkalyq júıe arqyly poıyzdaǵy tútindi, buzaqylyqty, sondaı-aq bet-álpetti taný sıaqty erekshe jaǵdaılardy anyqtaı alamyz. Bul jolaýshylardyń qaýipsizdigi men jaılylyǵyn qamtamasyz etýge baǵyttalǵan", – dedi "Jolaýshylar tasymaly" AQ basqarma tóraǵasynyń orynbasary Murat Tóregeldın.
Aıta keteıik, jańadan satyp alynǵan barlyq vagondar beınebaqylaý júıesimen tolyq jabdyqtalǵan kúıde jetkizilip jatyr.
