Ulttyq ekonomıka mınıstri – Premer-mınıstrdiń orynbasary Serik Jumanǵarın tutynýshylyq kredıtterdiń ósýi qazaqstandyqtardyń ál-aýqatyna qalaı áser etetini týraly pikir bildirdi.

Kýlýarda BAQ ókilderi mınıstrden:
— Tutynýshylyq kredıtter kóleminiń artýy halyqtyń áleýmettik jaǵdaıynyń nasharlaǵanyn bildirmeı me? — dep surady.

Serik Jumanǵarın bul pikirmen kelispeıtinin jetkizdi:

— Kredıt kóleminiń ósýi kerisinshe, halyqtyń belgili bir deńgeıde qarjy múmkindigi bar ekenin kórsetedi. Iá, keıbir azamattar "erteń qalaı qaıtaramyn?" dep oılanbastan nesıe alyp jatady. Osy sebepti qarjy retteýshisi nesıe almas buryn adamǵa oılanyp-tolý úshin bir táýlik ýaqyt beredi. Sondaı-aq "ruqsat etilgen júkteme koefısıenti" degen túsinik bar. Qazirgi tańda ol 50 paıyzdy quraıdy. Iaǵnı azamattyń jalpy qaryzy onyń tabysynyń jartysynan aspaýy kerek. Eger bul shekteýden assa, bank nesıe bermeıdi. Bizdiń usynysymyz — bul kórsetkishti 35 paıyzǵa deıin tómendetý, — dedi ol.

Mınıstrdiń aıtýynsha, nesıe alǵan adam óziniń qarjylyq múmkindikterin baǵamdaı biledi.

— Eger adam nesıe alsa, bul onyń belgili bir eseppen áreket etip otyrǵanyn bildiredi. Iaǵnı tabysy qaryzdy qaıtarýǵa jetedi degen sóz. Al endi Kaspi Red arqyly dári-dármek alý máselesine kelsek, bul — bólek áńgime. Qazaqstanda shamamen 12 mıllıon adamǵa tegin medısınalyq kómek kórsetiledi, onyń ishinde tegin dáriler de bar. Sondyqtan keıbir azamattar nege dárini bólip tóleýge satyp alady degen suraq týady. Kóp jaǵdaıda dárigerden resept alý arqyly qajetti dárilerdi tegin alýǵa bolady. Biraq bul jerde, bálkim, basqa dári túrleri jaıly sóz bolyp otyrǵan shyǵar, — dep túıindedi Jumanǵarın.