AQSH prezıdenti Donald Tramp 7 shildede Qazaqstan Prezıdenti Qasym-Jomart Toqaevqa Vashıngton 2025 jylǵy 1 tamyzdan bastap Qazaqstannan keletin barlyq taýarǵa 25 paıyz baj salyǵyn engizetinin habardar etip, hat joldady.

Aq úı basshysy hat mátinin Truth Social jelisindegi paraqshasynda jarıalady.

"2025 jylǵy 1 tamyzdan bastap sektorlyq bajdardan bólek, Qazaqstannan Amerıka Qurama Shtattaryna jiberiletin kez kelgen taýarǵa nebári 25 paıyz mólsherinde baj salyǵyn salamyz", - dep jazylǵan qujatta.

Tramp AQSH pen Qazaqstannyń saýda qatynasyn talqylaýǵa ýaqyty bolǵanyn aıtty, degenmen ol qazir Vashıngton "uzaq merzimdi tapshylyqtarmen" kúresý mańyzdy dep sanaıtynyn jetkizdi. Amerıka basshysynyń aıtýynsha, baj AQSH-ta tikeleı taýar óndiretin kompanıalarǵa qoldanylmaıdy.

"Qandaı da bir sebeptermen siz de tarıf engizemin dep sheshseńiz, olardy qaı deńgeıde engizseńiz de, bizdiń 25 paıyzǵa qosylady. Bul tarıfter saýda kedergilerin túzetý úshin qajet ekenin túsinińiz. Saýda teńgerimsizdigi bizdiń ekonomıkamyzǵa jáne ulttyq qaýipsizdigimizge úlken qaýip tóndiredi!" - dep jazylǵan hatta.