Qazaqstanda qylmys jasaǵan kúdikti Birikken Arab Ámirlikterinen qaıtaryldy, - dep habarlaıdy Bas prokýratýra.
Bas prokýratýra men İİM qyzmetkerleri Birikken Arab Ámirlikterindegi Qazaqstan elshiliginiń kómegimen Dýbaıdan buzaqylyq nıetpen jábirlenýshiniń densaýlyǵyna ortasha aýyrlyqtaǵy zıan keltirgen kúdiktini qaıtardy.
"Ol 2012 jyldyń 25 naýryzynda Temirtaýda buzaqylyq nıetpen jábirlenýshige sebepsiz birneshe ret dene jaraqatyn salyp, eki jerinen jaq súıegin syndyrdy degen kúdikke ilindi.
Qylmys jasaǵannan keıin kúdikti qashyp ketip, 12 jyldan keıin Birikken Arab Ámirlikteriniń aýmaǵynda anyqtaldy", - delingen habarlamada.
Qazirgi ýaqytta kúdikti qylmystyq jaýaptylyqqa tartý úshin Qazaqstan polısıasyna tapsyrylǵan.
