Qazaqstanda sportshylar, jattyqtyrýshylar men sport tóreshilerine qatysty etıka talaptary engizildi. Endi olarǵa beıádep sózder qoldanýǵa, dinı kózqarasyn jarıa kórsetýge jáne dinı úgit-nasıhat júrgizýge tyıym salynady. Bul týraly 2025 jylǵy 27 maýsymda Týrızm jáne sport mınıstri Erbol Myrzabosynov qol qoıǵan «Qazaqstan Respýblıkasynyń sporttyq etıkasyn bekitý týraly» buıryǵynda jazylǵan.

Jańa talaptar sportshylarǵa, jattyqtyrýshylarǵa, tóreshiler men oqytýshylarǵa birdeı qoldanylady. Endi olarǵa:

• Jattyǵý ne jarys kezinde dinı kózqarasyn jarıa etýge;
• Basqa adamdy dinı uıymǵa tartýǵa nemese mısıonerlik áreketke úgitteýge;
• Qoǵamdyq oryndarda mas kúıinde júrýge;
• Jarys ne jattyǵý jaıly jasyryn aqparatty jarıalaýǵa;
• Saıası urandar kóterýge tyıym salyndy.

Buǵan qosa, etıka normalaryna sáıkes, sportshylar Qazaqstannyń memlekettik rámizderine qurmetpen qaraýy, Ánuran mátinin bilýi, jáne marapattaý sátinde jartylaı jalańash nemese beıresmı kıimmen shyqpaýy tıis.

Jańa ereje 2025 jylǵy 19 shildeden bastap kúshine enedi. Mınıstrliktiń málimdeýinshe, bul ereje — qoǵamdyq turaqtylyqty saqtaý jáne sportshylardyń beıtaraptyǵyn qamtamasyz etý maqsatynda qabyldanǵan. Iaǵnı, sport – saıasat pen dinge emes, ádep pen adal básekege negizdelýi kerek degen ustanym basym. Áleýmettik jeli qoldanýshylary arasynda bul shekteý qoǵamdy artyq retteý dep qabyldaǵandar da, qajetti ári ýaqytyly qadam dep baǵalaǵandar da bar.