Shymkenttik Artyq Dosalıev 120 tonna júktegi 5 vagondy jalǵyz ózi súırep, Qazaqstan rekordyn jańartty

Shymkent qalasynyń turǵyny, 52 jastaǵy Artyq Dosalıev salmaǵy 120 tonna bolatyn bes júk vagonyn jalǵyz ózi súırep, jańa Qazaqstan rekordyn ornatty. Táýekeli men tabandylyǵyn dáleldegen sportshy bul jetistikke bir jyl boıy daıyndalǵan.

Ol shoıyn jol boıyndaǵy vagondardy toqtamastan 21 metr 40 santımetrge deıin jyljytty. Rekordty tirkeýge kelgen Qazaqstan rekordtar kitabynyń resmı ókili relsterdiń kólbeýligin, júktiń naqty salmaǵyn jáne araqashyqtyqty muqıat tekserip, nátıjeni resmı túrde rastady.

Artyq Dosalıev paýerlıftıng sportymen sońǵy úsh jyl boıy aınalysyp keledi. Osy ýaqyt ishinde ol 5 márte Álem chempıony, 2 dúrkin Eýropa jeńimpazy jáne 8 ret Azıa júldegeri atanǵan. Ol bul erekshe jetistigin Jeńistiń 80 jyldyǵyna, sondaı-aq el Táýelsizdigi jolynda janyn qıǵan batyrlar men uly tulǵalardyń rýhyna arnady.

Artyq Dosalıev, paýerlıftıngten Álem chempıony:

«Bul – meniń sońǵy rekordym emes. Aldaǵy jyly Jeńis merekesi qarsańynda 6-7, tipti 20 vagonǵa deıin súıreýdi josparlap otyrmyn. Budan bólek, “Boıng” ushaǵyn, Aqtaýda tanker súıreý oıymyzda bar».

Baqytjan Tastúlekov, Qazaqstan rekordtar kitabynyń resmı ókili:

«Bul árekettiń álem rekordyna aınalýy ázirge belgisiz. Óıtkeni biz ol jaıly málimetterdi zerttegen joqpyz. Degenmen, Artyq Dosalıevtiń jetistigi – Qazaqstandaǵy resmı túrde tirkelgen jańa rekord».