Zaman ózgerse de ustazdarǵa degen qurmet ózgermeıdi. Yqylym zamannan beri ustazdyqtyń shoqtyǵy bıik. «Tamshysymen tas tesetin beınebir sý tárizdi» dep ál-Farabı babamyz aıtqandaı, ustaz jandarǵa iltıpat tanytý – adamgershiligińniń ilgeri basýynyń bir qadamy. Óıtkeni, ustazǵa qurmet kórsetý – bilimge qurmet kórsetý. Osy rette jýrnalısıka salasyndaǵy ustazymyz, fılologıa ǵylymynyń doktory, IýNESKO, halyqaralyq jýrnalısıka jáne qoǵamdyq medıa kafedrasynyń meńgerýshisi Nazgúl Shyńǵysova jetekshimiz jóninde aıtqym keledi. Nazgúl apaıymyz óziniń bilimi men saýatynyń esesinde ár shákirtine jýrnalısıka salasynda kásibı maman bolýǵa múmkindikter syılady. Birneshe jyldan keıin de ustazymyzdyń stýdentteri bul týraly umytpaı fakúltetke jıi kelip, Nazgúl apaıdan keńes alǵanyn kózimizben talaı kórdik. Ustazymyzdyń ómirbaıanyna úńilsek, «profesor» ataǵyna qalaı ıe bolǵanyna kýá bolamyz.

Shyńǵysova Nazgúl Tursynbaıqyzy – fılologıa ǵylymdarynyń doktory, ál-Farabı atyndaǵy Qazaq ulttyq ýnıversıtetinde 1999 jyldan jumys istegen. 1995 jyly ál-Farabı atyndaǵy QazUÝ-diń jýrnalısıka fakúltetin úzdik dıplommen aıaqtap, aspırantýra bóliminde 1995-1998 jyldary bilimin jetildirip, 1999 jyly «Qazaq teledıdary jastar baǵdarlamasynyń problemalary» atty kandıdattyq dısertasıasyn qorǵaǵan. Keıinnen fakúltettiń televızıalyq jýrnalısıka kafedrasyna oqytýshy bolyp qabyldandy. 1999-2003 jyldary stýdentterdiń ǵylymı-zertteý jumysynyń jetekshisi, Jas ǵalymdar keńesiniń tóraıymy retinde fakúltette stýdentterdiń ǵylymı deńgeıin jetildirýge baǵyttalǵan is-sharalar ótkizgen. 2001 jyly irgesi qalanǵan BAQ menedjmenti jáne jarnama kafedrasyna aǵa oqytýshy retinde qabyldanyp, 2002-2010 jyldary BAQ menedjmenti jáne jarnama kafedrasynyń dosenti qyzmetinde, 2010 jyly 10.01.10 – jýrnalısıka shıfry boıynsha «Óńirlik merzimdi baspasózdiń damý tendensıalary (qazaq tildi jarıalanymdar boıynsha)» taqyrybymen doktorlyq dısertasıa qorǵaǵan. 2011 jyldyń qyrkúıeginen IýNESKO, halyqaralyq jýrnalısıka jáne qoǵammen baılanys kafedrasy meńgerýshisiniń ǵylym, ınovasıa, halyqaralyq qatynastar jónindegi orynbasary qyzmetin atqarady, RISO múshesi de bolǵan. "2011 jyldyń Joǵary oqý ornynyń úzdik oqytýshysy" grantynyń ıegeri atanyp, qoǵammen baılanys mamandyǵy boıynsha jumys oqý josparlaryn, bakalavrıat, magıstratýra, doktorantýrada 20 tıptik baǵdarlamalar, jumys oqý josparlary men elektıvti pánder katalogyn daıarlaǵan.  Sondaı-aq, jýrnalısıka, qoǵammen baılanys salalary boıynsha zertteý eńbekteriniń avtory ekendigin de tilge tıek etpesek bolmaıdy. Ol eńbekteri qazirde jas jýrnalıser úshin anyqtama kitap sekildi qundy dúnıege aınalǵan desek, artyq aıtqanymyz emes.

F.ǵ.d. N.T. Shyńǵysovanyń 1999 jyly «Qazaq teledıdarynyń jastar baǵdarlamasy» oqý quraly (11 b.t.), 2010 jyly «Óńirlik merzimdi baspasózdiń ózekti máseleleri» monografıasy (35 b.t.) men «Jýrnalısıka sosıologıasy» oqý quraly (11.7 b.t.) jaryq kórgen, sonymen qatar,  «Qazaq jýrnalısıkasy» 3 tomdyǵynyń avtorlarynyń biri. Nazgúl apaı «Qazaqstandaǵy PR men BAQ» ǵylymı jınaǵynyń avtorlar ujymynyń múshesi. Birneshe halyqaralyq sheteldik trenıńterden sertıfıkattar ıemdengen. Qazaqstan PR-shy (2005-2011) Klýbynyń İİ-H stýdenttik respýblıkalyq úzdik PR joba baıqaýynda júldeli oryndardy ıelengen stýdentterdiń ǵylymı jetekshisi bolǵan.

Mine, osyndaı ustazy bar shákirtter el bolashaǵyna úlesin qosar tulǵa bolyp qalyptasatynyna kúmánimiz joq. Shákirt sanasyna bilim nárin seýip, el bolashaǵynyń órenderin tárbıelep shyǵarý – ekiniń biriniń qolynan kele de bermeıdi. Ustaz bolý – júrek jylýyn, meıirim shýaǵyn, adamgershilik ulylyǵyn shákirttiń boıyna darytý. Ustaz bolý – jas urpaqtyń jarqyn bolashaqqa barar jolyn aıqyndap berý. «Adamnyń adamshylyǵy – jaqsy ustazdan» dep uly Abaı aıtqandaı, ustaz tárbıesi men ónegesi stýdent-shákirttiń bolashaq azyǵy. Jaqsy ustazǵa kezigip, tálim-tárbıemen qatar, ómir maıdanynda moıymaı kúresip, bolashaq jolǵa baǵyt alǵan biz – baqytty shákirtpiz. Urpaq bolashaǵy, halqymyzdyń keleshegi qazirgi Nazgúl apaıymyzdaı ustazdardyń qolynda. Egemendi, táýelsiz Qazaqstanda órkenıetke bastar joldyń bastaýy joǵary bilim desek, qazirde QazUÝ-dyń bolashaq jýrnalıseri men qoǵammen baılanys mamandaryn kásibılikke baýlyp júrgen Nazgúl ustazymyzdy sol dańǵyl joldyń bastaý desek bolady. Bizdiń kóptegen jetistikterge jetýimizdiń kóleńkeli tusynda Nazgúl apaıymyzdyń qanshama eńbegi jasyryn jatyr. Qazirdiń ózinde ustazymyzdyń shákirtteri telearnalar men radıo, memlekettik qyzmet, tanymal kompanıa pıarshysy degen sekildi laýazymdy qyzmetterde jumys jasaıdy. Mine, osylaı eńbek jolynda talmaı júrip, búginde ustazymyz eleýli 50 jasqa aıaq basty. Osy rette, Nazgúl ustazǵa atqaryp júrgen qıyndyǵy men qyzyǵy qatar júretin qyzmetińizdiń tek jemisin kórińiz dep tilek bildiremiz.

Halyqaralyq jýrnalısıka jáne qoǵamdyq medıa kafedrasynyń qyzmetkerleri