Májilistiń búro otyrysynda palata tóraǵasy Nurlan Nyǵmatýlın elimiz úshin kúrdeli kezeńde memleket basshysy Qasym-Jomart Kemeluly Toqaevtyń barlyq sheshimderi men batyl qadamdary biregeı jáne ýaqytyly ekenin atap ótti.

Búro otyrysy prezıdenttiń 10 qańtarda Jalpyulttyq aza tutý kúni dep  jarıalanýyna oraı, bir mınýttyq únsizdikpen bastaldy.

Nurlan Nyǵmatýlın depýtattyq korpýs atynan elimizdiń birqatar óńirlerinde bolǵan qaıǵyly oqıǵalardyń saldarynan qaza tapqandardyń jaqyndary men týǵan-týystaryna qaıǵylaryna ortaqtasyp, kóńil aıtty.

Májilis tóraǵasy depýtattar birinshi kúnnen bastap oqıǵa oryndarynda, alańdarda halyqpen birge júrgenin, Úkimettik komısıamen birge jumys istegenine toqtaldy. Sonymen qatar, barlyq depýtattar aımaqtarymen turaqty baılanysta bolǵanyn atap ótti.  

Otyrys barysynda depýtattar birqatar jańa zań jobalaryn jumysqa aldy. Atap aıtqanda, jeke qosalqy sharýashylyq týraly, kınematografıa jáne mádenıet máseleleri boıynsha, turǵyn úı saıasatyn reformalaýǵa qatysty ózgerister men tolyqtyrýlar engizý týraly zań jobalary bar.

Sondaı-aq palata komıtetteri jumysqa alatyn qujattardyń qatarynda Qylmystyq jáne Qylmystyq-prosestik kodeksterine ekologıalyq quqyq buzýshylyqtar úshin jaýaptylyqty kúsheıtý jáne Ákimshilik quqyq buzýshylyq týraly kodeksine ekologıalyq buzýshylyqtar úshin ákimshilik jaýaptylyqty kúsheıtý máseleleri boıynsha túzetýler engizý týraly zań jobalary bar.

Sonymen qatar, palata depýtattary birqatar ratıfıkasıalyq zań jobalaryn jumysqa aldy. Olar: tolyq emes jumys ýaqyty jaǵdaılaryndaǵy jumys týraly, Qazaqstan men Túrki Akademıasyna baılanysty kelisim jáne BUU medıasıa nátıjesinde qol jetkizilgen halyqaralyq tatýlasý kelisimderi týraly konvensıalary.