Komıtet dereginshe, tergeý barysynda Másimovtiń is-áreketinde kóptegen sybaılas jemqorlyq belgileri anyqtalǵan.
"Otandyq bıznes qaýymdastyqtary men sheteldik sýbekt ókilderinen jyljymaıtyn múlik, qymbat syılyqtar, sonyń ishinde mádenı qundylyqtar, eleýli mólsherde aqshalaı qarajat alý faktileri qujattaldy. Atap aıtqanda, jabyq kelisimsharttardyń biri boıynsha sheteldik memleket ókilderinen Másimovtiń UQK Tóraǵasy laýazymynda 2 mln. AQSH dollary somasynda para alý faktisi boıynsha tergeý júrgizilýde. Osy qarajatty Gonkongtan Qazaqstan Ulttyq bankine qaıtarý qamtamasyz etildi. Sonymen qatar, Másimovtiń Premer-Mınıstr laýazymynda bolýy kezeńinde bıznes-qurylymnyń birinen astanada quny 2,5 mlrd. teńge elıtalyq turǵyn úı men jer telimin alý faktisi boıynsha tergeý júrgizilýde" delingen habarlamada.
2022 jylǵy qańtarda Másimovti ustaǵannan keıin atalǵan turǵyn úıden 17,2 mln. AQSH dollary mólsherinde qolma-qol aqsha, sondaı-aq kóptegen qundy zattar – elıtalyq saǵattar, altyn kesekteri, antıkvarıat, bıznes sanattaǵy 11 qymbat avtomashına alynǵan.
"Múlikterine – Nur-Sultan q. eki elıtalyq páter, Almaty q. 2 páter men derbes saraı, sondaı-aq Shýche-Býrabaı shıpajaıy aımaǵy kóliniń jaǵasyndaǵy aýmaǵy 1 ga jer telimine tyıym salyndy. Másimovtiń jaqyn baılanystarynan 5,1 mln. AQSH dollary alynyp, oǵan tyıym salyndy. Osymen bir mezgilde Másimov pen onyń aınalasyndaǵylar shetel bankterine zańsyz shyǵarǵan asa iri mólsherdegi aqshalaı qarajatty izdestirý, buǵattaý jáne Qazaqstanǵa qaıtarý boıynsha jumys uıymdastyryldy" deıdi komıtettegiler.
Pikir qaldyrý