İshki ister mınıstrligi ákimshilik polısıa komıteti tóraǵasynyń mindetin atqarýshy Qaısar Sultanbaev shetelden 1 qyrkúıekke deıin kirgizilgen avtokólikter qalaı zańdastyrylatynyn aıtyp berdi.

Sultanbaevtyń sózinshe, izdeýde júrgen (qylmystyq kólik) nemese tolyq kedendik tazartýdan ótpegen sondaı-aq 2022 jyldyń 1 qyrkúıeginen keıin ákelingen avtokólikterden ózgesiniń bári zańdastyrylady. Tipti osy talaptarǵa keletin "oń rúldi" kólikter de, sary nomermen júrgen kólikter de Qazaqstan nomerin alady.

Avtokólikterdiń shyǵarylǵan jyly men ekologıalyq klasyna shekteý joq. Demek jyly jańa da, eskileý de kólikter zańdastyrylady.

Komıtet tóraǵasy mindetin atqarýshynyń dereginshe, elge 1 qyrkúıekke deıin 300 myńnan astam kólik kirgizilgen. Olar avtosaqtandyrý polısi arqyly anyqtalǵan.

– Avtosaqtandyrýlardyń eń kóbi Reseıden kelgen avtokólikterge berilgen, olar shamamen 260 myń, Qyrǵyzstan avtokólikteri – 25,5 myń jáne Armenıa kólikteri – 18 myń, – deıdi ol.

Sheteldik avtokólikterdi zańdastyrý qajetti zańnamalyq ózgerister kúshine enip, tıisti úkimet qaýlysy qabyldanǵannan keıin bastalady. Zańdastyrýdy jarty jyldyń kóleminde ótkizý josparlanyp otyr.

Avtokóliktiń Qazaqstanǵa kirý kúni Shekara qyzmetiniń derekter bazasy boıynsha aıqyndalady. Shekara qyzmetinde kólik quralyn ákelý týraly málimetter bolmaǵan jaǵdaıda avtokóliktiń Qazaqstan Respýblıkasynda naqty bolý kúni avtosaqtandyrý polısiniń alǵashqy resimdelgen kúni boıynsha aıqyndalatyn bolady. 

Zańdastyrý úshin 200 myń teńge, tehpasport pen memlekettik nómir úshin taǵy 13 171 teńge tóleý qajet. 2023 jylǵy 1 qańtardan bastap memlekettik nómir men tehnıkalyq pasport úshin tólem somasy AEK mólsherine baılanysty sál ózgeredi.

Zańdastyrýǵa ótinishti “Elektrondyq úkimet” portaly nemese arnaıy Halyqqa qyzmet kórsetý ortalyǵy arqyly júrgiziledi. Usynylǵan qujattar men kólik quraly izdestirý bazalary boıynsha tekseriledi. Odan keıin avtokólik arnaıy Halyqqa qyzmet kórsetý ortalyǵynyń tekserý pýnktine nómirlik agregattardy salystyrý úshin usynylady. Sodan keıin eger talap etilse, avtokólikke kedendik deklarasıalaý júrgiziledi, 200 myń teńge mólsherinde bastapqy alym, sondaı-aq tehpasport pen memlekettik nómir úshin memlekettik baj tólenedi. Tirkeý bekitilgennen keıin avtokólik ıesine qazaqstandyq tehpasport jáne memlekettik nómir beriledi.

Derekkóz: polisia.kz