Prezıdent Q.Toqaev úkimettiń keńeıtilgen otyrysynda úkimet bıyl elimiz tap bolǵan syn-qaterlerge qarsy tıimdi jumys isteı almaǵanyn aıtyp, mınıstrler kabınetin otstavka jiberý-jibermeý máselesin talqylaý kerektigin málim etti.

– Qoıylǵan mindetter tolyqqandy oryndalǵan joq. Al keıbir baǵyttar boıynsha múlde jumys jasalǵan joq. Mysaly, ábden eskirgen, qajeti joq normatıvtik aktilerdi joıý kerek ekeni osyǵan deıin de birneshe ret aıtyldy, úkimetke tıisti tapsyrmalar da berildi. Sonyń kesirinen mınıstrler jáne mekeme basshylary ózdiginen áreket etip, jedel sheshim qabyldaı almaıdy. Bitpeıtin jınalystarǵa, qujatty kelisý jumysyna óte kóp ýaqyt ketedi. Mınıstrlik jáne ulttyq kompanıa basshylary naqty sheshim qabyldaýǵa kelgende, ózderine jaýapkershilik alýdan bastaryn alyp qashady. Al tutas eldiń, halyqtyń taǵdyry sol mańyzdy sheshimge baılanysty bolyp jatatyny, ókinishke qaraı, eskerilmeıdi. Úkimet pen prezıdent ákimshiligi arasyndaǵy ózara is-qımyl durys jolǵa qoıylmaǵan. Jurtshylyq úkimettiń de, barlyq deńgeıdegi ákimderdiń de jumysyna qatysty aryz-shaǵym aıtýda. Halyqtyń sóziniń jany bar. Óıtkeni shyn máninde, kún kórý qıyndap barady, baǵa sharyqtap ósýde. Qaladaǵy jáne aýyldaǵy turǵyndardyń ómiri úshin asa mańyzdy ınfraqurylymnyń tozyǵy jetken, tipti, múshkil halde desek te artyq emes. Mundaı kezde qol qýsyryp, jaıbaraqat otyrýǵa bolmaıdy. Osyndaı jaǵdaı bárimizge qaýip tóndiretini anyq. Onyń ústine, kelesi jyl qazirgiden de kúrdeli, qıyn bolýy ábden múmkin, – dedi ol.

Osyndaı synnan keıin prezıdent úkimet otstavkasy týraly oıyn ortaǵa salyp, ony aldaǵy ýaqytta talqyǵa salý kerektigin jetkizdi.

– Úkimettiń negizgi mindeti – elimizdegi ekonomıkalyq máselelerdi sheshýmen aınalysý. Bul – úkimet músheleriniń, ákimderdiń, ulttyq kompanıa basshylarynyń tikeleı jaýapkershiligi. Sondyqtan men premer-mınıstr Álıhan Asqanuly Smaıylovtan shynaıy jaýap alǵym keledi. Jalpy, Jańa jylǵa úkimettiń osy quramymen aıaq basýǵa bola ma? Prezıdenttiń saılaýaldy baǵdarlamasyn júzege asyrý úkimettiń qolynan kele me? Úkimet ishten jáne syrttan bolatyn barlyq ekonomıkalyq qaýip-qaterlerge qarsy tura ala ma? Menińshe, bul máseleler memleket basshysynyń premer-mınıstrmen jáne parlament depýtattarymen ótkizetin konsýltasıalary kezinde muqıat talqylanýy kerek, – dedi ol.