Prezıdent Q.Toqaev elde qoıma ınfraqurylymynyń kenjeleýi azyq-túlik baǵasyna áser etip otyrǵan sebepterdiń biri ekenin aıtty. Bul týraly úkimettiń keńeıtilgen otyrysynda jetkizdi.

– Azyq-túlik baǵasyn ósirmeý úshin negizgi baǵyttar boıynsha naqty jumys júrgizý kerek. Ónimniń ózindik qunyn tómendetý, qajetsiz deldaldan arylý týraly biz birneshe ret aıttyq. Saýda jelilerin qoljetimdi etip, aınalymǵa qarjy salý úshin arzan nesıe berý tásilin de qoldanýǵa bolady. Bul baǵytta alǵashqy qadamdar jasaldy. Taýar óndirýshiden aldyn-ala tikeleı satyp alý erejesi qabyldandy. Búdjetten qarjy bólinetin boldy. Degenmen kóptegen sharýanyń kókónis saqtaıtyn jeri joq. Sol sebepti, olar ónimderin egis basynan tikeleı satýǵa májbúr bolady. Onyń saldary bárimizge belgili. Aýyl turǵyndary biraz tabysynan qaǵylady. Azyq-túliktiń baǵasy jyl mezgiline qaraı qatty ózgeredi. Kúzde sý tegin nárse kóktemde sharyqtap shyǵa keledi. Munyń sheshimi bireý ǵana – qoıma ınfraqurylymyn jasaý kerek. Biraq bul baǵyttaǵy jumys baıaý júrip jatyr, – degen prezıdent byltyr 83 myń tonna ónim saqtaıtyn qoıma salý kózdelgenin, alaıda jospar 64 myń tonnaǵa ǵana oryndalǵanyn atap ótti.

Al bıyl jumys birshama jandana túsken. 98 myń tonnalyq qoıma salý josparlanyp, sonyń 87 myń tonnasy qazirdiń ózinde iske qosylǵan.