Opozısıalyq saıasatker, tirkelmegen Demokratıalyq partıanyń jetekshisi Janbolat Mamaıǵa jańa aıyp taǵylýy múmkin. Bul týraly onyń zaıyby quqyqqorǵaýshy, jýrnalıs Inga Imanbaı habarlady.
"Memlekettik aıyptaýshy Erkin Baımaǵambetov sottan Janbolat Mamaıǵa jańa aıyp taǵý úshin ýaqyt surady. Iaǵnı, úkimet jazyqsyz jandy bosatýdyń ornyna, kerisinshe, onyń jaǵdaıyn odan ári ýshyqtyrý úshin baryn salýda. Prokýrordyń aıtýynsha, mundaı sheshimge sarapshy Roza Akbarovanyń qorytyndysy men aıyptaý tarapy kýágerleriniń bergen jaýaptary sebep bolǵan. Biz Janbolat Mamaıdyń jazyqsyz ekenin jáne oǵan taǵylǵan aıyptardyń jalǵan jala ekenin, ony qýdalaýdyń saıası astary bar ekenin qaıtalap aıtamyz" dedi Inga Imanbaı facebook paraqshasynda.
Janbolat Mamaı byltyr aqpan aıynda qańtar oqıǵasynyń 40 kúndigine oraı ótken qaraly mıtıńten keıin uzamaı ustalyp, qarashaǵa deıin tergeý ızolátorynda qamaýda otyrǵan. Oǵan o basta jappaı tártipsizdik uıymdastyrdy, polısıaǵa til tıgizdi, jalǵan aqparat taratty degen aıyptar taǵylǵan. Qazan aıynyń sońynda jappaı tártipsizdik uıymdastyrdy degen aıyp beıbit jıyn ótkizý tártibin buzdy degen jeńilirek aıypqa aýystyrylǵany belgili boldy. Al 2 qarasha kúni sot oǵan qatysty bultartpaý sharasyn ózgertip, tergeý ızolátorynan úıqamaqqa jibergen. Sodan bergi sot otyrystary áldeneshe ret keıinge qaldyrylǵan.
