Búgin Nur-Múbarak ýnıversıtetinde «Islamdyq baǵyttaǵy destrýktıvti jáne radıkaldy dinı ıdeologıany ustanýshylardy radıkaldy kózqarastan aryltý jáne ońaltý salasyndaǵy mamandardyń biliktiligin arttyrý» kýrsy bastaldy.

Qazaqstan Respýblıkasy Aqparat jáne qoǵamdyq damý mınıstrliginiń Din isteri komıtetimen birlesken bir aılyq joba bıyl tórtinshi jyl qatarynan uıymdastyrylýda. Saltanatty ashylýda rektor, profesor Muhammad ash-SHahhat:

«Qurannyń bizge nasıhaty qoǵamǵa paıdaly, el amandyǵyn saqtaýǵa úles qosatyn adam jan-jaqty ilim jınaýy, bilikti maman bolýy mańyzdy. Bizdiń úmmet – eń abzal úmmet, biraq bul «biz keremetpiz, abzalmyz» dep qur sózben shektelý emes. Qoǵamdaǵy kez kelgen problemanyń tetigin qarastyrý, bilim arqyly sheshimin tabý qashanda ózekti»,- deı kele, tyńdaýshylarǵa sáttilik tiledi.

Al QR AQDM DİK Dinı bilim berý uıymdarymen ózara is-qımyl basqarmasynyń basshysy Halym Qonaı jobany 4 jyl qataryna atqaryp kele jatqan ýnıversıtet basshylyǵyna alǵysyn aıta kele, atalǵan kýrstyń sátti ótýine tilek bildirdi. Nur-Múbarak ýgıversıtetiniń otandyq dinı joǵary bilim berý salasyndaǵy mańyzyn da atap ótti. Búgingi elimizdiń túkpir-túkpirinen kelgen 75 mamanǵa kýrstyń ereksheleligi men talaptaryn qysqa da nusqa túsindirdi.

Kýrsqa kelgen eldegi dinı salaǵa tikeleı qatysy bar teolog, ıslamtanýshy, dintanýshy, ımamdar bir aı boıy 140 akademıalyq saǵatqa negizdelgen 16 pánnen biliktiligin arttyrý dáristerin ótpek.  Ádistemesi boıynsha akademıalyq tásilimen, deradıkalızasıa ádisteriniń akademıalyq máselelerin, maqsatty toptarmen (radıkaldarmen) ataýly túsindirý jumysyn uıymdastyrý, destrýktıvti dinı aǵymdarǵa erýshilermen jumys isteý tásilderin qamtıtyn ózekti dáristik baǵdarlamasymen  erekshelenedi. Baǵdarlamaǵa saı óz salasynda bilikti ári jetekshi mamandar, ıaǵnı Nur-Múbarak EIMÝ, Gýmılev atyndaǵy EUÝ, Qazaqstan musylmandary dinı basqarmasy, sondaı-aq osy salada QR Ulttyq qaýipsizdik komıteti Akademıasynyń tájirıbeli mamandary dáris beredi.

Nur-Múbarak ýnıversıtetiniń baspasóz qyzmeti