Qaraǵandy oblysynda órt bolǵan "Qazaqstan" shahtasynyń qyzmetkerleri basqa kásiporyndarǵa aýystyryldy. Bul týraly oblystyq ákimdiktiń apparat keńesinde "ArselorMıttal Temirtaý" AQ atqarýshy dırektorynyń orynbasary Sergeı Ogaı málimdedi.
Apparat keńesi bir mınýt únsizdikten bastaldy. Memlekettik qyzmetshiler "ArselorMıttal Temirtaý" AQ Kómir departamentiniń "Qazaqstan" shahtasynda órt kezinde qaza tapqan kenshilerdi eske aldy.
"ArselorMıttal Temirtaý" AQ Taý-ken segmenti atqarýshy dırektorynyń orynbasary Sergeı Ogaıdyń aıtýynsha, shahtada órtti oqshaýlaýǵa kirisken.
"Búgingi tańda shahtanyń 672 qyzmetkeri Kómir departamentiniń basqa kásiporyndaryna aýystyryldy. Qyzmetkerlerden shahtanyń tirshiligin qamtamasyz etý jáne áskerılendirilgen qutqarýshylardyń jumysyna kómek kórsetetin adamdar ǵana qaldy", – dedi Ogaı.
Qaraǵandy oblysynyń ákimi Ermaǵanbet Bólekpaev órt bastalǵan ýaqytta 222 shahterdi jedel evakýasıalaǵan qutqarýshylardyń eńbegin atap ótti.
"Ókinishke qaraı, bes kenshi qaza tapty. Kompanıa qaza tapqandardyń otbasylary aldynda mindetteme aldy. Barlyq qajetti tólem jasalady. Apatty tergeý jónindegi komısıa quryldy, onyń quramyna barlyq jaýapty memlekettik organ kirdi, – dedi oblys basshysy.
Ákimdiktiń aqparatynsha, qazir aýrýhanada zardap shekken 13 kenshi jatyr, barlyǵy qajetti em alýda. Dárigerlerdiń aıtýynsha, 8 kenshiniń jaǵdaıy ortasha aýyr, qalǵandary qanaǵattanarlyq jaǵdaıǵa jaqyn.
Pikir qaldyrý