Qazaqstannyń Ýkraınadaǵy elshisi Darhan Qaletaev qyzmetinen áli ketpegenin málimdedi. Buǵan deıin kásipker Danat Jýmın áleýmettik jelidegi paraqshasynda Ýkraınada elshi Darhan Qaletaevpen kezdeskenin jazdy.
Elshi ony "dıplomatıalyq mısıasynyń aıaqtalýyna arnalǵan sharaǵa" shaqyrdy. Jýmın elshilikte túsken fotosyn da jarıalady.
"Kıevke kelgen boıda elshilikke bardym. Sóıtse, týra sol kúni bizdiń Ýkraınadaǵy elshimiz Darhan Qaletva óziniń dıplomatıalyq mısıasyn aıaqtady", - dep jazdy Jýmın.
Biraq Darhan Qaletaevtyń ózi elshi qyzmetin aıaqtaǵanyn rastaǵan joq.
"Asyqpańyz, men áli elshimin", - dedi ol buqaralyq aqparat quraldaryna bergen suhbatynda.
Al syrtqy ister mınıstrligi elshiler tek prezıdenttiń jarlyǵymen ǵana qyzmetinen bosatylatynyn eske saldy.
Pikir qaldyrý