Buǵan deıin jelide keıbir adamdardyń ádemi selfı jasaý úshin gúlderdi qalaı talap, kórsetetin vıdeokadrlar paıda bolǵan.

Almaty ekologıa jáne qorshaǵan ortany qorǵaý basqarmasynyń málimetinshe, qazir Esentaı ózeniniń boıynda ósip turǵan qyzǵaldaqtar kúzde egilgen. Aýa raıy qolaıly bolǵan kezde gúlder sáýirdiń ortasynan mamyrǵa deıin gúldeıdi deıdi mekeme.

“Áleýmettik jelilerde tirkelgen faktilerge baılanysty departament Almaty turǵyndary men qonaqtaryn sándik gúldi kógaldandyrýǵa jáne qoǵamdyq oryndarǵa qamqorlyq jasaýǵa shaqyrady”, – dep habarlady Almaty ákimdigi.

Vedomstvo qoldanystaǵy zańnamaǵa sáıkes abattandyrý erejelerin buzǵany úshin ákimshilik jaýapkershilik qarastyrylǵanyn eske salady.

Jeke tulǵalarǵa eskertý nemese 20 AEK (73 840 teńge), shaǵyn kásipkerlik sýbektilerine 30 AEK (110 760 teńge), orta kásipkerlik sýbektileri úshin 40 AEK (147 680 teńge), iri kásiporyndar úshin 100 AEK (369 200 teńge) aıyppul salynady.

Aıta keteıik, sırek kezdesetin ósimdikterdi, sonyń ishinde "Greıg" qyzǵaldaǵyn julǵandar qylmystyq kodekstiń 339-baby 1-tarmaǵy boıynsha jazalanady. Atalǵan bap boıynsha kináli dep tanylǵan adamǵa 3 myń AEK (11 mln 76 myń teńge) mólsherinde aıyppul salý nemese 3 jylǵa bas bostandyǵyn aıyrý/shekteý, bolmasa 800 saǵatqa deıingi merzimge qoǵamdyq jumystarǵa tartý jazasy qarastyrylǵan.