Depýtat Erlan Saırov Kárim Másimovtiń aktıvterin qaıtarý baǵytynda jumystardyń júrgizilip jatqanyn aıtty. 

"Otanǵa opazdyq" baby boıynsha qylmysqa eshqandaı keshirim berýge bolmaıdy. Máselen, eger ondaı adamǵa búgin raqymshylyq bersek, erteńgi kúni Qazaqstan memleketine qarsy jumys istemesine kim kepil? Kárim Másimovtiń qarjysy áli qaıtarylǵan joq. Onyń mıllıardtaǵan dollary shetelde jatyr. Sondyqtan bul isti jiti qarap, memlekettiń múddesi tarapynan sheshim qabyldanýy kerek, – dedi Erlan Saırov.

Taǵy bir Májilis depýtaty Edil Jańbyrshınniń aıtýynsha, memleketke opasyzdyq jasaǵan adamǵa raqymshylyq berilmeıdi.

Memleketke qastandyq jasap, onyń ústine 230-dan kóp adamnyń ólimine kináli bolǵan adamdy qansha jyl ótse de bostandyqqa shyǵarmaý kerek dep oılaımyn. Ol memleketke qastandyq jasap, byt-shyt qylyp jibere jazdady. Biz Qazaqstanymyzdy joǵaltyp ala jazdadyq. Sırıa sekildi jaǵdaıǵa dýshar bolýdyń aldynda qaldyq. Sondyqtan mundaı adamdarǵa eshqandaı raqymshylyq bolmaýǵa tıis, – dep jaýap berdi depýtat Májilis kýlýarynda.

Buǵan deıin habarlaǵanymyzdaı, memleketke opasyzdyq jasaǵany jáne bılikti basyp alýǵa tyrysqany úshin sottalǵan UQK-niń burynǵy basshysy Kárim Másimov bıylǵy jyldyń naýryz aıynda raqymshylyq jasaý týraly ótinish bergen.