Sol kezdegi aımaqtyq resýrstyń alǵashqy efıri nebári 3-aq saǵat bolǵan edi. Alǵashynda spektáklder, fılmder, sondaı-aq jańalyqtar eksperıment retinde taratyldy. Keıinnen shyǵarmashylyq toptyń kúsh-jigeri men eren eńbeginiń arqasynda telearna kórermenderdiń kóńilinen shyǵyp, ystyq yqylasyna bólene bastady.

Telearnanyń bas dırektory Tımýr Bazarbaevtyń aıtýynsha, Almaty TV 25 jyldyq mereıtoıynda kórermenderin eki jańa maýsymymen qýantpaq. Olardyń biri kóktemde kórermenge jol tartqan edi. Kúzgi maýsymǵa taǵy da birneshe ǵajaıyp, rýhty shoý jáne telearnada óndirilgen 7 telehıkaıa daıyndalyp jatyr.

«Mereıli jyly bizdiń ujym áleýmettik jáne qaıyrymdylyq baǵytynda 40-qa jýyq shara ótkizbek. Mysaly, jańalyqtar efırinde «25 qaıyrymdy is» aıdary, al digital-platformamyzda balalarǵa arnalǵan «Armanyńa jet» jobasy jaryqqa shyǵady. Osy sátti paıdalanyp, sóz sońynda kórermenderimizge rızashylyq bildirgim keledi. Sizderdiń qoldaýlaryńyzben telearnamyz jańa jetistikterge jete beredi dep senemin», - dedi Tımýr Bazarbaev.

Atap aıtarlyq jaıt, 2022 jyldyń tamyzynan bastap Almaty TV respýblıkalyq mártebe alyp, Qazaqstan Respýblıkasynyń barlyq aýmaǵynda taratylatyn arnalar tizimine endi, al onyń aýdıtorıany tehnıkalyq qamtýy 47 paıyzdan 89 paıyzǵa ósti. 

Sol jyly telearnanyń rebrendıngi jasaldy. Brendtiń ashyq jasyl túste jańǵyrtylýy Almaty TV arnasynyń jańa kezeńin - dástúrli efırlik jáne sıfrlyq ınternet-ortanyń sınergıasyn beıneledi. Bul oraıda «zamanaýı klasıkaǵa» basymdyq berildi. Bul televıdenıeniń eresekter aýdıtorıasy men áleýmettik jeli kontentin, strımıngtik onlaın-resýrstardy qoldanatyn jas urpaqtyń basyn biriktireri sózsiz.

Salynǵanyna 7 jyl bolǵanda, ıaǵnı, 2023 jyly telearnanyń bas stýdıalyq pavılony jańartyldy. Jańǵyrtý aıasynda zamanaýı beıimdelgish dekorasıalar jasalyp, alǵash ret polımerlik quımaly jabyn paıdalanyldy. Stýdıanyń paıdaly aýmaǵy 2 ese úlkeıtildi. Almaty qalasy ákimdiginiń qoldaýymen jańadan túsirý jáne montajdaý qurylǵysy satyp alyndy.  

Efırlik saıasatty jetildirý sharalarynyń nátıjesinde Almaty TV arnasynyń teleqaralym kórsetkishteri turaqty túrde jaqsaryp keledi. «K Research Central Asia» málimetteri boıynsha byltyr kórermen sany 4,2 mln boldy. Al memlekettik tildegi ózindik óndiris úlesi 83 paıyzǵa jetti.

Jańa aqparattyq strategıany júzege asyrý nátıjesinde telearnanyń ınternettegi orny da aıtarlyqtaı nyǵaıdy. Saıt kórsetkishteri 5 ese – 9 mln-nan 45 mln qaralymǵa deıin artty. YouTube jazylýshylarynyń sany 1,2 mln-nan asty. Jaqyn ýaqytta jańartylǵan veb-saıt pen onyń mobıldik nusqasy da usynylady.