QR Kólik mınıstrligi qalalar arasynda jolaýshylar tasymalymen aınalysatyn inDrive jáne Iandeks júrgizýshilerine qoıylatyn talaptardy kúsheıtpek.

Kólik mınıstrligi komıtetiniń basshysy Álı Altaı inDrive jáne Iandeks qosymshalarynyń paıda bolýy jolaýshylar tasymaly salasyna úlken damý alyp kelgenin aıtty.

Komıtet basshysynyń aıtýynsha, qazir osy qosymshalar arqyly jolaýshy tasymalymen aınalysatyn júrgizýshilerge jyldamdyqty jáne atalǵan júrgizýshilerdiń jumys jáne demalys rejımin saqtamaǵany úshin jaýapkershilikti qarastyratyn túzetýler paketi daıyndalýda.

-Júrgizýshiler 8 saǵattan artyq kólik júrgizbeýi kerek, óıtkeni olar qyraǵylyǵyn joǵaltady. Bizde jol-kólik oqıǵalarynyń 35 paıyzy dál osyndaı jaǵdaılarǵa baılanysty. Biz jol kartasyn qabyldaımyz, ol jerde zańsyz tasymaldaýshylarmen kúresetin pýnktter bar. Sonyń ishinde InDrive jáne Yandex baǵdarlamalyq qosymshalary da bar. Bul jumysty İshki ister mınıstrligimen birlesip júrgizetin bolamyz, – dedi kólik komıtetiniń basshysy.

Jańa joba mynadaı tártippen jumys isteıdi: İshki ister mınıstrligi kóliktiń ortasha jyldamdyǵyn baqylaıdy. Máselen, ereje saqtalsa, Qaraǵandydan Astanaǵa bir saǵatta jetý múmkin emes. Sondaı-aq ishki ister mınıstrligi taksı júrgizýshileriniń zańsyz jınalatyn oryndaryn jáne júrgizýshiniń qansha saǵat kólik júrgizgenin baqylap otyrady. Eger júrgizýshi rúlde 8 saǵattan artyq otyrsa, oǵan aıyppul salynady.

Sonymen qatar, kólik mınıstrligi Qazaqstannyń aımaqtary arasynda tasymaldaıtyn jolaýshylar avtobýstaryn jańartýdy josparlap otyr.