Tótenshe jaǵdaılar vıse-mınıstri Baýyrjan Syzdyqbaev bul úshin jaýapkershilik qarastyrylǵanyn aıtty.

"Tótenshe jaǵdaı tańǵy 4:10-da boldy, biraq habarlama bizge eki saǵattan keıin, ıaǵnı 6.08-de keldi. Azamattyq qorǵaý týraly respýblıkalyq zańnamaǵa sáıkes, buǵan jol berýge bolmaıdy jáne bul úshin zań boıynsha jaýapkershilikke tartylady", – dedi Syzdyqbaev úkimet brıfıńinde.

Osy boıynsha 200 AEK (738 myń teńge) aıyppul salyndy, sondaı-aq qazir is sotta. Syzdyqbaev zaýyt óz aýmaǵyna qutqarýshylardy kirgizbegenin rastady.

"Ýchaskede ózderiniń qutqarý bólimsheleri bar jáne olar óz betterimen órtti óshiretinderine senimdi bolǵan. Biraq munda shaqyrtý kelip túskendikten, bizdiń qutqarýshylar keldi, sol úshin olardy kirgizýi kerek edi", – dedi vıse-mınıstr.

Syzdyqbaevtyń sózinshe, qutqarýshylardy kirgizbeı qoıýǵa eshkimniń quqyǵy joq.

Eske salaıyq, 20 shildede Qaraǵandy feroqorytpa zaýytynda tótenshe jaǵdaı bolyp, 8 jumysshy ártúrli dárejede jaraqat alǵanyn jazǵan edik. Keıingi úsh kúnde zardap shekken 8 qyzmetkerdiń tórteýi aýrýhanada kóz jumdy. Atalǵan derek boıynsha qylmystyq is qozǵalyp, arnaıy komısıa da qurylǵan. 

Feroqorytpa zaýytyna tıesili “YDD Corporation” kompanıasy qaıtys bolǵan 4 jumysshynyń otbasyna qoldaý kórsetip, kómektesetinin málimdedi. Kompanıa jerleý rásimin uıymdastyrý, as ótkizý jáne mazar salý boıynsha barlyq shyǵyndy óz moınyna alady.