ALMATY. QazAqparat - Almatyda Dostyq Úıinde Qazaq handyǵynyń 550 jyldyǵyna arnalǵan «Jibek jolyndaǵy suhbat» - «Ortalyq Azıa: óńirdegi halyqtardyń yntymaqtastyǵy» ekspedısıa músheleri óz áserlerimen bólisti.
«Ekspedısıanyń basty maqsaty - Uly jibek joly boıyndaǵy, sonaý Qytaıdan bastap Batys Eýropaǵa deıingi halyqtardyń birligin seziný. Negizgi áńgime aýany Ortalyq Azıa tóńireginde boldy. Aımaq halqyna ortaq dúnıeler óte kóp. Ortalyq Azıanyń Iran, Qytaı, Úndistan memleketterin damytýda róli zor boldy. Búginde 550 jyldyǵyn toılap jatqan Qazaqstan da osy úlken tizbektiń mańyzdy múshesi. Munda ortaq aqparattyq máselesi óte mańyzdy. Ortalyq Azıa ekonomıkamyzdy, saıasatymyzdy, mádenıetimizdi biriktiretin ortaq aqparattyq keńistikke ıe. Zıaly qaýym ókilderiniń shyǵarǵan deklarasıasy eshqashan bılik nazarynan tys qalǵan emes. Bizdiń bastamalarymyz memleket saıasatynyń negizine aınalýy yqtımal», - dedi qoǵam qaıratkeri Seıdahmet Quttyqadam.
Ekspedısıa músheleri óz saparlaryn Aqsý-Jabaǵyly qoryǵynan bastap Ystyqkólde, Qapshaǵaıda, Almaty oblysynda bolyp, Qytaıǵa da saparlap qaıtqan.
Búgin joba músheleri Taraz qalasynda ótkeli otyrǵan Qazaq handyǵynyń 550 jyldyǵynyń negizgi is-sharalaryna qatysýǵa attanyp ketti.
Taraz qalasynda «Jibek jolyndaǵy suhbat» jobasynyń aıasynda «Ortalyq Azıa: óńirdegi halyqtardyń yntymaqtastyǵy» taqyrybynda Muhamed Haıdar Dýlatı atyndaǵy TarMÝ-da dóńgelek ústel ótedi.
Aıta ketý kerek, «Jibek jolyndaǵy suhbat» - bul mádenıetaralyq dıalog turǵysyndaǵy jalpy mádenı jáne jalpy tarıhı qundylyqtardy odan ári damytýǵa ári saqtaýǵa yqpal etip, kórshi elderdiń sarapshylarymen yntymaqtastyqty nyǵaıtatyn Qazaqstan halqy Assambleıasynyń bastamasymen ótkiziletin halyqaralyq joba.
Bul joba belgili qoǵam qaıratkeri, mádenıettanýshy Murat Áýezov bastamasymen júzege asyrylyp keledi. Jobaǵa Qazaqstan, Qyrǵyzstan, Tájikstan, Túrkimenstan jáne Ózbekstan zıaly shyǵarmashylyq qaýym ókilderi qatysýda.
2007 jyldan bastap joba Qazaqstan halqy Assambleıasy, Mádenıet jáne aqparat mınıstrligi, «QHA áleýmettik konsorsıýmy» QQ men QHA etnomádenı ortalyqtary qoldaýymen júzege asyp keledi.
2014 jyldan bastap uıymdastyrýshylardyń sany L.N.Gýmılev atyndaǵy Eýrazıa ýnıversıtetiniń IýNESKO kafedrasymen tolyqtyrylyp, IýNESKO-nyń ulttyq komısıalarynyń qoldaýyna ıe boldy.
Derekkóz: QazAqparat
