TARAZ. QazAqparat - Tarazdaǵy Tórtkúl kerýen saraıynda qytaılyq Sıan qalasynan Qazaq handyǵynyń 550 jyldyǵyn toılaý qarsańynda shyǵyp, bir jyldaı Uly Jibek joly boıymen júrgen ekspedısıany qarsy aldy.
Eske sala keteıik, 2014 jylǵy qyrkúıekte Sıannan ejelgi saýda jolymen «Qytaı - Qazaqstan: Uly Jibek jolynyń shaı mádenıeti» dostyq jáne yntymaqtastyq kerýeni Jibek jolynyń ekonomıkalyq beldeýin qurý ıdeıasyn qoldaý maqsatynda jolǵa shyqqan bolatyn. Kerýen quramynda 55 túıe bar, bul Qazaq handyǵy qurylýynyń 550 jyldyǵyn bildiredi. Júzden astam kerýenshiler Tań áýleti dáýirindegi kıimder kıip, kúzetshileri ertedegi uzyn sapty naızalarmen qarýlanǵan. Kerýen Shensı provınsıasynda ósiriletin fýsa emdik shaıyn ákeldi.

Qashyqtyǵy 7 myń shaqyrymnan asatyn saıahatty uıymdastyrýǵa Qazaqstannyń dúngen qaýymdastyǵy men qytaılyq «I-Ze Fýsa» kompanıasy (Sıan) nıet tanytty.

«Qazaq handyǵynyń 550 jyldyǵyna arnalǵan sharalarǵa qatysý men úshin úlken mártebe, - dedi «I-Ze Fýsa» kompanıasynyń prezıdenti Ma Hyn Gon. - Qazaqstan Prezıdenti men halqyna baqyt pen densaýlyq tileımin. Uly Jibek Jolyn jandandyrý boıynsha sharalar alǵa qoıylǵan maqsattarǵa jetkizedi, elderimizdiń saýda-ekonomıkalyq dálizin jańartyp, Qazaqstan men Qytaı arasynda ózara tıimdi jáne tatý kórshilik qatynasty nyǵaıtatynyna senemin».

Tarazdyń batys bóliginde ornalasqan Tórtkúl kerýen saraıyn 2008 jyly Á.Marǵulan atyndaǵy Arheologıa ınstıtýtynyń mamandary qazdy. 80 sharshy metr aýmaqta qonaq úıler, monshalar jáne Uly Jibek jolynyń kerýen saraılaryn qamtyǵan barlyq ınfraqurylymy bar ejelgi kerýen saraıdyń qaldyqtary tabyldy.

2010 jyly júrgizilgen qalypqa keltirý jumystaryna qazynadan 97 mln. teńge bólinip, 5 metrlik qabyrǵalar kóterildi, ishki ınterer jańadan qurastyryldy.

Derekkóz: QazAqparat