ALMATY. QazAqparat - Almatyda «Súıispenshilikpen...» dep atalatyn qazaqstandyq jańa telejoba aıasynda «Almaty-Amsterdam» avtosherýi uıymdastyrylady. Bul týraly búgin Almatyda ótken baspasóz brıfıńi barysynda osy telejobanyń rejıseri Abdel Elýbaev málimdedi.

«Bul avtosherý elimizde 2017 jyly bolatyn «EKSPO-2017» halyqaralyq kórmesi men qysqy Ýnıversıada oıyndaryna baǵyshtalyp otyr. Bul jobanyń maqsaty Qazaqstandy búkil Eýropa keńistigine tanytý. Bul ıdeıa osydan jarty jyl buryn týyndaǵan edi. Biz óz kúshimizben týrızm salasyna qatysty óte bir sapaly telebaǵdarlama jasaýdy armandadyq. Sóıtip,  «Súıispinshilikpen... Almatydan!» dep atalatyn qanatqaqty alǵashqy habardy daıyndadyq. Kórermender oǵan oń baǵa bergen soń, biz munymen shektelip qalmaýdy jón kórdik. Sodan avtokólikpen júrip otyryp, bolǵan jerlerimizde jergilikti jurtshylyqpen kezdesýler ótkizip, Qazaqstan jaıly túsirgen fılmderimizdi kórsetýdi jáne bolǵan jerlerimiz jaıly óz  kúshimizben telehabarlar ázirlep shyǵarýdy uıǵardyq. Sodan 8 adamnan quralǵan komanda quryldy. Onyń quramynda rejıser, prodúser, eki telejúrgizýshi, dybys rejıseri, fotograf, ákimshi jáne bir avtokólik júrgizýshisi bar», - dedi A. Elýbaev.

Aıta ketelik, «Almaty-Amsterdam» avtosherýine qatysýshylar  ústimizdegi jyly 8 qazanda Almatydan demeýshiler usynǵan eki avtokólikpen jolǵa shyǵady. Sapar barysynda shyǵarmashylyq top Astana, Máskeý, Mınsk, Brest, Varshava, Praga, Berlın, Parıj jáne Amsterdam qalalarynda bolady.

«35 kúnge arnalǵan avtosherý barysynda oǵan qatysýshylar 30 myńnan astam shaqyrymdy basyp ótedi. Buǵan shamamen 5 tonna benzın jumsalady», - dedi óz sózinde «Almaty-Amsterdam» avtosherýine janarmaı jaǵynan demeýshilik kórsetken  - «Gazpromneft-Qazaqstan» JSHS jelilik jetekshisi Marat Malataev.

Uıymdastyrýshylardyń aıtýynsha, avtosherý barysynda túsirilgen telehabarlar aldaǵy ýaqytta otandyq telearnalardyń birinen kórsetiledi. 

"Qamshy"silteıdi

Derekkóz: QazAqparat