ALMATY. QazAqparat - Bıylǵy «Almaty týry» velojarysy ótken jylǵy jarysqa qaraǵanda qıynyraq boldy. Óıtkeni, myqty komandalar, myqty veloshabandozdar jınaldy, dedi jarys sońynda jýrnalıserge bergen suhbatynda «Almaty týry-2015» velojarysynyń jeńimpazy - «Astana Pro Team» komandasynyń veloshabandozy Alekseı Lýsenko. 
«Bıylǵy jarys ótken jylǵy jarysqa qaraǵanda aýyr boldy. Óıtkeni, myqty komandalar, myqty veloshabandozdar jınaldy. Bul tek meniń ǵana jeńisim emes, búkil komandanyń jeńisi. Meni osy «Astana pro team» komandasy ósirdi, jetildirdi. Sondyqtan, bul jeńis barlyǵymyzǵa ortaq», - dedi A. Lýsenko.

Sonymen qatar, ol márege 25 shaqyrym qalǵanda negizgi toptan sytylyp shyǵyp, keıin jalǵyz óziniń alǵa shabýyl jasaýynyń sebebin túsindirdi.

«Bul jaǵdaı osy jarys barysynda oryn aldy. Ázerbaıjannyń Baký komandasynyń shabandozy márege 25 shaqyrymdaı qalǵanda alǵa umsyndy. Men de alǵa umtyldym. Sóıtip, ekeýmiz negizgi toptan birge sytylyp shyqtyq. Ol keıin artta qalyp qoıdy. Men jeke-dara kósh bastadym. Sodan birtindep jyldamdyqty údete túsip, márege deıin eki mınýttaı ýaqyt uttym», - dedi A. Lýsenko.

«Komandanyń kóshbasshysy bolýǵa daıynsyń ba?» - degen suraqqa Alekseı daıyn ekendigin jetkizdi.
«Men tipti aldaǵy jyldyń ózinde qandaı da bir halyqaralyq jarysqa komandanyń kóshbasshysy retinde qatysýym da múmkin. Muny endi komanda basshylyǵy sheshedi», - dedi A. Lýsenko.

Aıta ketelik, «Astana Pro Team» komandasynyń veloshabandozy Alekseı Lýsenko Halyqaralyq «Almaty týry» velojarysynda osymen ekinshi ret jeńise qol jetkizdi. Onyń kórsetkishi - 4 saǵat 13 mınýt 09 sekýnd. 
Al ótken jylǵy jarysta ol 186 shaqyrymdyq qashyqtyqty 4 saǵat 12 mınýt 17 sekýntda basyp ótken bolatyn

Derekkóz: QazAqparat