QYZYLORDA. QazAqparat - Prezıdent Nursultan Nazarbaev BUU Bas Assambleıasy sesıasynyń minberinen sóılegen sózinde Qazaqstannyń syrtqy saıasattaǵy aıqyn ustanymy: ıadrolyq qarýsyzdaný, ıadrolyq synaqtarǵa tyıym salý, beıbit atom máseleleri, terorızm men dinı ekstremızmge qarsy kúres t.s.s. mańyzdy máselelerdi alǵa tartty.
Elbasynyń BUU-daǵy sóılegen sózi jaıly pikirin Qorqyt Ata atyndaǵy QMÝ fılosofıa jáne mádenıettaný kafedrasynyń meńgerýshisi, profesor Ońǵar Bermahanov osylaısha órbitti.
«Bul jańa ıdeıa alǵash ret álemdik deńgeıde Qazaq eliniń óz táýelsizdigi men múddesiniń kepili, sonymen qatar eshbir eldiń múddesine qaıshy kelmeıtin ustanym retinde qazaq tilinde alǵash ret usynyldy. Ol úshin BUU ekonomıkalyq jáne áleýmettik keńesin Jahandyq damý keńesine aınaldyrý qajet. Keńes qazirgi ekonomıkalyq jáne qarjy daǵdarysymen kúresetin ortaq uıym bolýy tıis. Osy baǵytta álemdik emısıa jáne álemdik rezervtik valútalar aınalymyn retteý qajet. Munyń ózi barlyq elderdiń múddelerin teń dárejede ustaı alatyn jańa álemdik valútany daıyndaýdy kún tártibine qoıady. Ýkraına daǵdarysy men sanksıalar quqyǵy BUU Qaýipsizdik Keńesiniń quzyrynda bolýy tıis. Óıtkeni onyń mıllıardtaǵan adamnyń taǵdyryna tikeleı áseri bar. Terorızm men dinı ekstremızm máselesi de osy baǵytta sheshilýi tıis.
Sondaı-aq bıik minbeden álem elderin «Bolashaqtyń energıasy» taqyrybyndaǵy Astanada ótetin «EKSPO-2017» kórmesine qatysýǵa shaqyra otyryp, Jasyl tehnologıany damytý ortalyǵyn ashýǵa BUU qoldaýyn surady»,-dep bir túıindedi profesor.
«QR Prezıdentiniń sońǵy Joldaýlary men bastamalarynda aıtylyp júrgen «taıaý bolashaqtaǵy álemdik arhıtektýranyń ózgerýi» boljamy Qazaqstan múdesine sonymen birge barlyq elderdiń maqsattary men múddelerine qaıshy kelmeıtin álemdik jańa baǵytty qajet etetini ózinen ózi túsinikti. buǵan jaýap retinde BUU qoldaýymen «Jańa bolashaq» (NEW FUTURE) tujyrymdamasyn usyndy. «Jańa bolashaq» degenimiz-«ıadrolyq, energetıkalyq sý jáne azyq-túlik qaýipsizdigi, senim, jáne ózara túsinistik»,-dedi Memleket basshysy. Eger atalǵan problemalardy tarqata taldasaq, onyń adamzat balasynyń túpkilikti múddelerine qatysty ekenin baǵamdaý qıyn emes. Osyǵan qosa álemdik damý vektoryn boljaı otyryp, damýshy kúshterdiń Azıa óńirine aýysqanyn, sondyqtan BUU Bas shtabyn Azıaǵa qaraı kóshirý máselesin de oılastyrýdy usyndy. Bul barlyq elderdiń qoldaýyn, rızashylyǵyn týdyrady dep oılaımyn. Álemdik damý logıkasyna negizdelgen, demek ádiletti usynys ekendigi daý týdyrmasa kerek»,-dep qorytyndylady O. Bermahanov.
