AQTÓBE. QazAqparat - Aımaqta Qazaq handyǵynyń 550 jyldyǵyn merekeleý aıasynda Áıteke bı aýdanynda Kishi júzdiń uly hany, jońǵarlardan azat etý kúresinde biriktirilgen qazaq halqy jasaqtaryna qolbasshy bolǵan Ábilqaıyr han jerlengen «Han molasy» ortaǵasyrlyq qorymynda qazaqtyń eń ataqty handarynyń birine arnalǵan memorıaldyq keshen ashyldy.
Ábilqaıyr han babalarynyń bastaýymen qazaq jaýyngerleri Saıram, Túrkistan jáneTashkent qalalaryn qorǵaý jolynda eren erligimen kózge tústi. 1728 jyly qazaq áskeri jeńiske qol jetkizdi. Bul shaıqastar Ulytaý taýlarynda, Qarasıyr jeri men Bulanty ózeniniń boıynda boldy, munda qazaqtar qontaıshynyń uly basqaratyn ekspedısıalyq korpýsty talqandady. Bul jeńisten keıin halyq kókeıinde jeńiske qol jetkizýge bolady degen senim uıalady. Basqynshylarǵa qarsy halyq jumyla kóterildi.
1730 jyly kóktemde Balqashtyń ońtústik shyǵysyndaǵy Itishpes eldi mekeninde Ábilqaıyr bastaǵan qazaq áskeri jaýlardy taǵy talqandady. Jońǵarlarǵa qarsy júz jyldyq soǵysta qazaq halqy ózgeristi kezeńge aıaq basty, jeńiske bir taban jaqyndaǵandaı boldy.
Aqtóbede mereıtoıdy atap ótý barysynda Ábilqaıyr hannyń eskertkishine gúl shoqtaryn qoıý rásimi, qoldanbaly óner sheberleriniń halyqaralyq jármeńkesi, fotokórme, aımaqtyq aqyndar aıtysy, ǵylymı konferensıa, Saıram shaıqasynyń qatysýshysy, batyr Tileý Aıtulyna arnalǵan eskertkishtiń ashylý saltanaty bolyp ótti.
Áıteke bı aýdanyndaǵy Tolybaı aýylynda eldiń birneshe aımaǵynan jınalǵan fólklorlyq ansámblder festıvali ótti, etnoaýyl ashyldy, konsertter, at sporty jarysy jáne halyq jarystarynyń basqa túrleri ótip, Ábilqaıyr hannyń murajaıy ashyldy.
Memorıaldyq keshenniń ashylýyna eldiń kóptegen aımaqtarynan, kórshiles Reseıden qonaqtar, Qazaqstannyń memleket jáne qoǵam qaıratkerleri, Parlament depýtattary, han urpaǵy jınaldy.
Shara barysynda Aqtóbe oblysynyń ákimi Berdibek Saparbaev, Qostanaı oblysynyń ákimi Arhımed Muhambetov, QR Parlament Senatynyń depýtaty Eleýsin Saǵyndyqov, Mádenıet jáne sport mınıstrliginiń jaýapty hatshysy Qýatjan Ýálıev, QR Ulttyq murajaı dırektory Darhan Myńbaı, jobanyń bas sáýletshisi Bek Ybyraev jáne taǵy basqalary sóz sóıledi.
