ERTEŃ ÓLİP KETERMİN KİM BİLEDİ?

Erteń ólip ketermin kim biledi,
Kóńil sezse ishimdi myń búredi.
Bizdiń taǵdyr tez sóner áıteý bir kún,
Janyp turǵan teginde súmbile edi.

Ómirzaıa bolarmyn kim biledi,
Tań atady, kún shyǵyp tún kiredi.
Ózimniń de sol jaqqa ketkim kep júr,
Taǵdyr qurǵyr tánimdi tilgiledi.

Kim biledi ólgen soń kelgen bar ma?!
Ketkendi de, kelgendi kórgen de Alla!
Jemtik bolyp quzǵynǵa aram qatqan,
Bala kúnnen esimde ólgen qarǵa.

Sol qarǵadaı bir kúni qalam men de,
Quzǵyndardy túsirip aram terge.
Ólmeı jatyp «ólem» dep óleń jazsam,
Tabalaıdy bireýler sarań der me.

Bireýler de óledi kim biledi,
Olardyń da erteńi kúńgir edi.
Tátti ómirdi ańsaýǵa zaýqym da joq,
Kóktegiler bir kúni búldiredi.

Tamaǵyma túıilip túıin muńdar,
Óńeshime qan bolyp quıyldyńdar.
Tánim-tobyr, topalań janym jalǵyz,
Jalǵyzdyqtan japanda qıyn kim bar?!

Tiri júrseń tirlikte keksheńdegen,
Túbime kóp haıýandar jetsem degen.
Janarlardy toltyryp jasqa máńgi,
Búgin ólip ózim-aq ketsem be eken...?!
 

Taba almadyq
Bir baqytty izdedik taba almadyq,
«Taptyq» dedik!
taǵdyrdy taǵy aldadyq.
Biz izdegen bir baqyt baqıda eken,
Qaıta almadyq ol jaqqa bara almadyq.

Bir qýanysh izdedik qýansaq dep,
Ketsek dedik ómirge bir án sap kep.
Jylap kelip ketemiz jylap taǵy,
Qýanamyz jymıyp týalsaq tek.

Bir mahabbat izdedik taba almadyq,
«Taptyq» dedik!
júrekti taǵy aldadyq.
Biz izdegen mahabbat kókte deıdi,
Perishte bop kórýge jaralmadyq.

Bir asyldy izdedik alyp kúshti,
«Taptyq» dedik!
juldyz ol jaryq qushty.
Juldyz ekesh juldyz da máńgi emesti,
Qara jerge qamyǵyp aǵyp tústi.

Bir nárseni izdeýge asyǵamyz,
Tappasaq ta taptyq dep asyramyz.
Shyndyq izdep taba almaı aqyrynda,
Ótiriktiń daryna asylamyz.

Bir adamdy izdedik kezip kópten,
Qara jerden taba almaı kezip kókten.
Máńgi ólmeıtin adamdy kórdik biraq,
Táńir bergen taǵdyrdan bezip ketken.

Bir óleńdi izdedik taba almadyq,
«Taptyq» dedik!
Aqyndy taǵy aldadyq.
Óleń taptyq ólmeıtin ıesi onyń,
Táńir eken... Táńir bop jaralmadyq! 

Qara tún

Men sendikpin qushaǵyńdy ash qara tún,
Qıal qusym saǵan jaıyp qanatyn.
Samǵaı ushty san armandy arqalap,
Shoǵyryna juldyzdardyń aǵatyn.

Seni kútem kún batqan soń qara tún,
Shymshylaıdy shydamsyzdaý taǵatym.
Bes kún jalǵan jaryǵynan jalyǵyp,
Meniń janym senen lázzat tabatyn.

Qap-qarańǵy qara túnek qara tún,
Men bir beıbaq esigińdi qaǵatyn.
Bálkim sende toqtap qalar ýaqyt a...
Myna jaqta syrǵyp jatyr saǵatym.

Sheksiz-sheksiz kórinbeıtin qara tún,
Janarymnyń nury jetpeı talatyn.
Túnegińe sińip ketsem adasyp,
Báz bireýdiń kózinen jas tamatyn...

Ol da mendeı bir beıbaq-aý qara tún,
Meni kútip kelgenimdi baǵatyn.
Beıtanys ol... maǵan jaqyn áıteýir
Bizge ortaq bir shyrpyny jaǵatyn...
Qara tún!
 

Taýda óstim. Taýda týdym. Taýǵa baram

Arysy taý ańyzy – Ámirsana,
Teginde jońǵar jatqan ámir sala.
Berisi saı-salaly qart tóbeler,
Arasy shatqal-shatqal qońyr sala.

Taýlary qoltyqtasyp Jylandymen,
Jazyǵyn jaılap jatqan qulan kileń.
Qaraǵaı qaýlap ósken, taýdan jetken,
Salaıyn jańǵyryqtan bir ándi men.

Kóktoǵaı!
Kóp toǵaıdyń ortasynda,
Babamnyń tańbasy bar jartasynda.
Qara Ertis malta tasy maltyp júrer,
Tompaıyp ár túınektiń qaltasynda.

Men de sol túınektermen tel óskenmin,
Týǵannan jotalarmen teń óskenmin.
Shildede Qara Ertiske boı súńgitip,
Qaqaǵan aqpanynda seń eskenmin.

Janarǵa shaǵyp alsa jas tolatyn,
Qalaqaı, bar balaǵa qas bolatyn.
Ańǵal jurt jota kezip, tezek terip,
Arshanyń ıisine mas bolatyn.

Taýlyqpyz. Taý kiretin túsimizge,
Qaınaıtyn jemis bitken ishimizde.
Shaıyryn qaraǵaıdyń shaınaýshy edik,
Tisimiz sireskenshe tisimizge.

Tastary eteginen saýmalaǵan,
Dáretsiz ań-qusy da aýnamaǵan.
Janymnyń kıesi de ıesi sol, 
Taýda óstim. Taýda týdym. Taýǵa baram. 

Almatyǵa taǵy keldi tún aýyp... 

Ne spıtsá mne. Takaıa lýnnost
Eshe kak býdto beregý
V dýshe ýtrachennýıý ıýnost
(Esenın)

Almatyǵa taǵy keldi tún aýyp,
«Ý» alyp...
Men otyrmyn syr shertisip baıaǵy,
Kóńilshekteý buıra bultpen jylaýyq.

Jasyn tógip janarynan jasqana,
Renjitti me tas qala...
Tún aýǵanda túrtip meni oıatqan,
Mazasyz oı sen de meni tastama.

Kóshedi bult, juldyz sónip aısyz tún...
Túnek basty. Jaısyzbyn...
Bári uıqyda. Terezeniń aldynda,
Men oıaýmyn, búgin taǵy oı súzdim.

Bálkim bári ózgeretin shyǵar a...?!
Kóktóbe de... Munara...
Men ańsaǵan arman aldan kútedi,
Armanshylmyn shyda júrek, jylama!

Bireý esik qaǵyp keler «baqyt» bop,
Erip ketem ýaqyt joq...

Shımaı-shımaı oılar osy mıymda,
taǵdyr jolyń qıyn ba?!
Tynyshtyq ber! Tilemeımin ózge muń,
ózge baqyt. Kerek emes syıyń da.

Meni túnim uıyqtatýǵa kelmegen,
Mazasyz oı tergegen.
Saǵat tili artqa aınalyp ketse ǵoı,
Besigime qaıta jatsam terbegen!

...Tyrmalap jyr jazýdamyn ózimshe,
Bireý ony sezinse...
Qudaı seniń kózińshe!
 

Marǵulan AQAN