Qasıetti Báıdibek bı, Domalaq ananyń izi qalǵan aımaqqa kógildir otyn jetti

Aldyn ala sál ozyp aıtsaq, «Beı­neý – Bozoı – Shymkent» magıstral­dy gaz qubyrynyń «Shaldar» avtomat­tandyrylǵan gaz taratý stansasyn iske qosý rásiminde «QazTransGaz» AQ bas dırektory Qaırat Sháripbaev «gaz keldi degenshe, jaz keldi deseńizshi» degen sóz aıtqan.

Ózi aıtqandaı aýylda ósken, apa-ápke­leriniń tezek, sosyn kómir ja­ǵyp pesh basynda alaý-dalaý bolyp júrge­nin kórgen azamat tabıǵaty qataldaý osy óńirdegi analardyń basyndaǵy jaǵdaıdy dóp basty.

Sol kúni túnde bastalǵan jaýyn kú­ni boıy aspan asty tesilgendeı sorǵa­lady da turdy. Alaıda, keıde ekpindep, seldetip te alatyn jańbyr kógildir otyndy san ondaǵan jyldar kútken halyqtyń kóterińki kúıine onshalyqty áser ete qoıǵan joq.

Gaz berýge jáne gaz alaýyn jaǵýǵa oraı ótken saltanatty sharaǵa Ońtústik Qazaqstan oblysynyń ákimi Beıbit Atamqulov jáne «QazTransGaz» AQ bas dırektory Qaırat Sháripbaev, merdiger uıymdardyń ókilderi men jergilikti turǵyndar qatysty.

Atalǵan jobany iske asyrý, avto­mat­tandyrylǵan gaz taratý stan­­sasy (AGTS) jáne «Beıneý – Bozoı – Shym­kent» magıstraldy gaz qubyry­nan oǵan tar­tylatyn gaz qubyryn salý «Qaz­TransGaz» AQ-tyń óz qaraja­ty ese­binen júzege asyryldy. Gaz quby­rynyń jalpy uzyndyǵy 32 sha­qyrymdy quraıdy.

Saltanatty jıynda Ulttyq ope­ra­­tor QazTransGazdyń basshysy tur­ǵyndardy kógildir otynnyń kelýimen quttyqtap, endigi jerde ońtústik óńirdi gazben jabdyqtaý isiniń tarıhı kezeńi bastalǵanyn atap ótti.

– Biz buǵan deıin gaz máselesinde kór­shi memleketterge táýeldi bolyp kel­dik. «Qazanshynyń erki bar, qaıdan qulaq shyǵarsa» degendeı, olar keıde kógildir otynnyń baǵasyn qymbattatatyn, keıde ber­­meı de qoıatyn. Endi ondaı táýel­­dilikten kettik. «Beıneý – Bozoı – Shym­kent» magıstraldy gaz quby­­rynyń 2-shi kezeńi – 311 shaqyrym­dyq «Beıneý – Bozoı» bóligi iske qosyl­ǵaly 7 mlrd. tekshe metr gazdy ońtús­tikke tasymaldaý múmkindigi týdy. Mu­nyń bári Elbasymyzdyń energetı­kalyq qaýipsizdikti qamtamasyz etý baǵytyn­daǵy alysty boljaǵan syndarly saıasa­tynyń jemisi.

Al oblys ákimi Beıbit Bákiruly 2020 jylǵa deıin kógildir otynnyń Shaıan – Sozaq baǵytyndaǵy taralý aımaǵyn eldi mekender boıynsha taratyp berdi. Endi ot jaǵý máselesinde turmystyq qıyndyqtardan qutylatyn aýyl turǵyndaryn quttyqtady.

Uly Abaıdyń «Qarasha, jeltoqsan men sol bir eki aı» dep keletin áıgili óleńinen úzindi keltirgen Qaırat Shárip­baev «aýyl turǵyndary da qala­lyq­tardan kem emes turmys keshýge tıis», dep atap ótti. Kompanıa jumysynyń áleýmettik salmaǵy úlken bolatyny da sondyqtan. Otyn tasyp, ot jaǵý qar­balasy bastalǵan qarasha aıynda gaz beri­lýi­niń ózi el eńsesin kádimgideı kóterip tastaǵany anyq.

«Elbasy N. Nazarbaevtyń Qazaqstan halqyna Joldaýyn iske asyrý aıasynda «QazTransGaz» AQ jergilikti atqarýshy organdarmen birlesip, respýblıkanyń óńirlerin gazdandyrý jóninde belsendi jumys júrgizýde. Al, búgingi is-shara soǵan tolyqtaı aıǵaq bolmaq. Báıdibek aýdanyn gazdandyrý jónindegi joba­nyń mańyzdy ekonomıkalyq máni bar. Biz aıtylǵan ýádeli ýaqytta, ıaǵnı dál jy­lytý maýsymy bastalǵan kezde kóp­ten kútken tabıǵı gaz berdik. Endi osy úl­ken aýdannyń 52 eldi mekeninde tura­tyn 55 myńnan astam adam alǵash ret eń yńǵaıly otyn túrin paıdalanýǵa múmkindik aldy», dedi ol.

AGTS-tyń ótkizý qabileti óte joǵa­ry, sondyqtan ol Báıdibek aýdanynyń barlyq eldi mekenderin ǵana emes, sondaı-aq, kórshiles jatqan 50 myń turǵyny bar iri Sozaq aýdanynyń da qajettiligin jabýǵa múmkindik beredi.

Kompanıa gaz qubyrynyń boıynda ornalasqan ónerkásiptik obektilerdi jáne eldi mekenderdi gazdandyrýdy jalǵastyrady. Atap aıtqanda Jambyl oblysynyń Jańatas jáne Qarataý qalalaryn da gazdandyrý kózdelýde.

Búgin elimizde bar gaz magıstraldaryn biryńǵaı ishki jelige qosqan «Beıneý – Bozoı – Shymkent» magıstraldy gaz qubyry iske qosylǵannan bastap, osy magıstraldyń boıynda ornalasqan 500-den astam eldi meken­di gazdandyrý múmkindigi týyp otyr. Eń bas­tysy, osy magıstral iske qosyl­ǵannan bastap, Qazaqstan elimizdiń batys óńirinde óndiriletin otandyq gazǵa tolyǵymen kóshti.

Báıdibek aýdandyq ardagerler keńe­siniń tóraǵasy Tiles Arynbekov osy jaq­sylyqtardyń basynda Elbasy Nursultan Ábishuly Nazarbaevtyń turǵandyǵyn tilge tıek etti. Qasıetti Báıdibek, Áziret Qarataý óńiri Keńes Odaǵy kezinde eń artta qalǵan aýdandar sanatyna jatatyn edi. «QazTransGaz» Áýlıe Báıdibek, analardyń piri Domalaq ananyń izi qalǵan óńirge kógildir otyn ákeldi. Bul bizdiń memleketimizdiń kemeldenýiniń belgisi, dedi.

Saltanatty rásimnen keıin oblys áki­mi Beıbit Atamqulov bastaǵan qonaq­tar aýdan ortalyǵynda turatyn Uly Otan soǵysynyń ardageri Beısenbek Igisinovtiń shańyraǵyndaǵy kógildir otyn berilý sharasyna qatysty.

Beısenbek Igisinuly 1924 jyly 5 mamyrda Qosaqjar selolyq sovetine qarasty Turmys kolhozynda (qazirgi Tańatar) dúnıege kelgen. Bilimi joǵary, mamandyǵy qarjyger-ekonomıst, Le­nın­­grad qalasyndaǵy qarjy-ekono­mıkalyq ınstıtýtyn bitirgen.

1942 jyly qyrkúıek aıynda Qy­zyl Armıa qataryna shaqyrylyp, Ka­lının, Baltyq teńizi, Kenısberg baǵyt­taryndaǵy maıdandarda soǵysqa qatys­qan. Maıdanda kórsetken erlikteri jo­­ǵary baǵalanyp orden, medaldarmen ma­­rapat­talǵan. Qyzmetti isteı jú­rip qo­ǵamdyq jumysqa belsene qatys­ty. 1993 jyly aýdandyq ardager­ler keńe­siniń tóraǵasy qyzmetine saı­lan­ǵan. 2002 jyly aýdandyq bıler alqasynyń tóbe bıi bolyp saılandy. Osy qyzmetti búgingi kúnge deıin atqaryp keledi. Halyqqa eńbegi ótken aqsaqaldyń otbasyna kógildir otyn tegin kirgizildi.

Shaıan aýylynyń turǵyndary aıtýly merekege aıryqsha daıyndalypty. Aýdan ákimi Batyrbek Kósherbaıdyń iskerlik qabileti aıqyn tanylady. Sáý­letti ǵımarattar kúrdeli jóndeýden ót­ken. Jyp-jınaqy. Shashaý jatqan dú­­nıe joq. Kósheler túgelge jýyq abat­tan­dy­rylǵan. Jańbyrdyń shelektep quıǵandyǵyn aıttyq. Sonda da ortalyq alańǵa jınalǵan kópshiliktiń kóńil-kúıi kóterińki. El aýzynda «Aqmarjan» atanyp ketken ánshi, osy aýyldyń týmasy Zattybek Kópbosynuly arnaıy qalqada eki án aıtqannan keıin tómen tústi.

– Aınalaıyn, aǵaıyn. Allanyń bar kúni jaqsy. Aýdanymyzǵa gaz kelip jatqanda Allanyń nury jaýyp tur. Sýyq. Túsinemin. Biraq, osyndaı uly jıynda jańbyrdan qorqyp bı bılemeýge bola ma?! Kelińizder, saltanatymyzdy asyraıyq, eldiń qýanyshyn bóliseıik, – dedi. Aq kımeshekti, oıýly beshpent kıgen ájeler ánshini ortaǵa alyp bıledi. Jańbyrdy elegen eshkim joq. Óıtkeni, kópten kútken kógildir otyn úıge kirdi, baıaǵy mehnat artta qalǵan. Elbasynyń tapsyrmasy alys aımaqtarda osylaı oryndalyp jatyr.

Derekkóz: "Egemen Qazaqstan"