قازاق – تاعدىر تالكەگىن كوپ كورگەن حالىق. قولدان جاسالعان سانداعان زۇلماتتار مەن ءتۇرلى قۋعىن-سۇرگىن سالدارىنان قازاقتاي شاشىلعان ەل جوق شىعار. ەلباسى ن. نازاربايەۆ ايتقانداي، وسى كۇنگە دەيىنگى قازاقتىڭ تاريحى بىرىگۋ تاريحى بولىپ كەلەدى. وسى بىرلىك پەن ۇلتتىق ءبىراۋىزدىلىقتى ماقسات ەتكەن قور قۇرىلدى جاقىندا.
«ءبىر ەلدە ءومىر ءسۇرىپ، ءبىر قازاق بولا تۇرسا دا ءجۇز بەن رۋعا، ءدىن مەن تىلگە، جەرگە بولىنەتىن قازاعىمىزدىڭ قازىرگى كۇيى كوڭىل قۋانتارلىقتاي ەمەس. زامان وزگەردى م، ادام وزگەردى مە دەپ وتىرا بەرسەك، وتىرا بەرەمىز. ەلدى بىرلىككە شاقىراتىن، اتادان ءداستۇر بولىپ قالعان مەيىرباندىق پەن قايىرىمدىلىق قاسيەتتەرىمىزدى قالپىنا كەلتىرۋگە ناقتى ارەكەت كەرەك»، - دەيدى «الەم قازاقتارىنىڭ بىرلىك قورى» اتتى قوعامدىق بىرلەستىكتى قۇرعان ازاماتتار.
وسى جەردە ۇيىمداستىرۋشىلار بۇل ۇيىمنىڭ قانداي دا ءبىر ساياسي مۇددەلەردەن، ساياسي ماقساتتاردى كوزدەيتىن توپتاردان ادا ەكەنىن ەرەكشە اتاپ وتىر.
«قوردى قۇرۋداعى نەگىزگى ماقساتىمىز: دۇنيەجۇزىندەگى قازاقتاردىڭ باسىن قوسۋ، قايىرىمدىلىق جولىندا جۇمىس جاساپ، ماتەريالدىق جاعدايى ناشار، كوپ بالالى جانە تولىققاندى ەمەس وتباسىلارعا كومەك كورسەتۋ، ەلىمىز بەن جەرىمىزدىڭ، ۇلتىمىزدىڭ بولاشاعى ءۇشىن ەڭبەك ەتىپ، ءبىر كىسىدەي كومەك قولىن سوزۋ،ءوز ۇلەسىمىزدى قوسۋ.»، - دەيدى ۇيىمداستىرۋشىلار.
قوردىڭ باسشىسى تاڭىربەرگەن بايمۇرزايەۆ دەگەن اقساقال. 1935 جىلى تۇركىستان ولكەسىندە دۇنيەگە كەلگەن اتامىز قىزمەت جولىن شىمكەنت قالاسىندا باستاعان ەكەن. ۇزاق جىل قۇرىلىسشى- ينجەنەر بولىپ ەڭبەك ەتكەن اتامىز بۇگىندە - مۇسىلماننىڭ بەس پارىزىنىڭ ءبىرىن ورىنداعان قاجى. تاڭىربەرگەن قاجىنىڭ ارتىنان ەرگەن باۋىلارىنىڭ ءبىرى، قوردى ۇيىمداستىرۋشى ءارى وڭ قولى رايىس ءارىپجان ۇلى.
«ەۆرەيلەر كەزىندە 600 جىل مەملەكەتسىز جۇرگەندە وسىنداي قورلارى جۇمىس ىستەپ تۇرعان. ءبىز دە الەمدىك تاجىريبەلەردى زەرتتەي كەلە وسىنداي قور قۇرۋ كەرەك دەگەن ويعا كەلدىك. قوردىڭ ماقساتى – قۇرىلتايشىلارىن بايىتۋ ەمەس، كەدەي-كەپشىككە كومەكتەسۋ، ۇلتقا قىزمەت ەتۋ»، - دەيدى تاڭىربەرگەن قاجى بايمۇرزايەۆ.
قور قۇرىلتايشىلارى ۇيىمنىڭ قايىرىمدىلىقتان باسقا رۋحاني، مادەني باعىتتاعى جۇمىستارعا دا دەمەۋشىلىك جاسايتىنىن ايتادى.
ەرلان تولەۋباي
