بۇگىنگىنىڭ باس تاقىرىبى ءدىني راديكاليزم، ۋاححابيزم-سالافيزممەن كۇرەس بولىپ وتىر. جەر-جەرلەردە راديكالدى اعىمدارعا تىيىم سالۋ، ولارمەن كۇرەستى كۇشەيتۋ تۋرالى كوپ ايتىلۋدا. وسى ەلدىڭ ءبىر ازاماتى رەتىندە بۇل ماسەلەگە قاتىستى مەنىڭ دە ايتارىم بار.

ءدىني اعىمدار، ءتۇرلى راديكالدىق ۇيىمدارعا بىرىنشىدەن بەلگىلى ءبىر يدەيا وزەك بولسا، ەكىنشىدەن ونداي اعىمداردىڭ قىزمەتى قىرۋار قارجىعا نەگىزدەلەدى. مەملەكەت قولدا بار مۇمكىندىكتەرى، زاڭ ارقىلى ونداي تەرىس اعىمداردىڭ تەك قارجى كوزدەرىن جاۋىپ، ءتۇرلى كىتاپتارىن تاركىلەۋى مۇمكىن. ياعني، ماتەريالدىق قۇندىلىقتارىنا عانا شەكتەۋ قويا الادى. ال، يدەوگولوگياسىمەن قالاي كۇرەسەدى؟ ادامداردىڭ سويلەۋىنە تىيىم سالعانمەن، ويلاۋىنا توسقاۋىل قويا المايمىز عوي. سوندىقتان، بۇل باعىتتا باسقاشا جۇمىس، باسقاشا ارەكەت كەرەك.

90-جىلدارى رەكيت، بانديت بولىپ كۇنەلتكەن نەبىر قاراقشىلار زامان تۇزەلگەندە بيلىكتى، اكىم-قارالاردى جاعالاپ، وزدەرىن قۋعىن-سۇرگىننەن امان ساقتاپ قالعانىن بىلەمىز. تەك امان قالىپ قويماي، كەشەگى قىلمىس الەمىنىڭ سەركەلەرىنىڭ ءبىرازى بۇگىندە ساياساتتا دا سەركە بولىپ جۇرگەنى ەشكىمگە جاسىرىن ەمەس. كىسى ءولتىرىپ، جالعان قۇجات جاساعان، اتىن وزگەرتىپ، قىلمىسىن جاسىرعان قاندىقولدىڭ «نۇر وتان» پارتياسىنا ءوتىپ، دەپۋتات بولعانىن دا كوز كوردى. سول سياقتى رۋحاني سالاداعى بوس كەڭىستىكتى «تولتىرۋعا» كەلگەن تەرىس اعىم جەتەكشىلەرى مەن ۇستانۋشىلارى دا زاڭ كۇشىنە مىنە باستاعاندا بيلىكتى جاعالاپ، ءبىر-بىر شەنەۋنىكتى توڭىرەكتەپ، وزدەرىنىڭ «لەگيتيمدىلىگىن» كۇشەيتۋگە تىرىستى. ول ويلارى جۇزەگە استى دا. بۇگىندە بار قازاقتى الاڭداتىپ وتىرعان، بەيبىت كۇندە وق اتىپ، ەلدىڭ ءىشىن الا تايداي بۇلدىرگەن ءۋاححابيزم-سالافيزمدى اشىق قولدايتىن، بارلىق ءدىني تانىم-تۇسىنىگى سول يدەولوگياعا نەگىزدەلگەن ازاماتتار سونداي ويمەن وبلىس، رەسپۋبليكا كولەمىندەگى بەلدى-بەلدى ۇيىم، مەكەمەلەردى توڭىرەكتەپ ءجۇر. وندايلار بيلىك پارتياسى، باس پارتيا سانالاتىن «نۇر وتاندا» كەزدەسپەيدى دەپ سەنىمدى تۇردە ايتا المايمىز.

پارتيا جەتەكشىلىگىنە كەلگەن مۇحتار ابرار ۇلى كوپ جەردە ساندىق كورسەتكىشتەرگە عانا ءمان بەرىلگەن كەيبىر كەمشىلىكتەردى تۇزەۋگە شاماسى جەتەتىن تۇلعا. ءتىپتى، پارتيا جەتەكشىلىگىنە وسى ۋاقىتقا دەيىن سايلانعان ساياساتكەرلەردىڭ ىشىندە شوقتىعى بيىك ازامات دەسەك تە ارتىق بولمايدى. پارتيالىق جۇمىستان بولەك، مەملەكەتتىك حاتشى، مينيستر، پرەزيدەنت كەڭەسشىسى بولعان تاجىريبەلى شەنەۋنىك قانا ەمەس، قازاقتىڭ جانىن تۇسىنەتىن، ارعى-بەرگى تاريحىنان حاباردار تۇلعا.

بيىل ماۋسىم ايىندا باتىس وڭىرلەردى ارالاعان مۇحتار قۇل-مۇحاممەد ءوزىنىڭ دىننەن دە، اراب عىلىم-بىلىمىنەن دە حاباردار جان ەكەنىن اڭعارتىپ، جارتى الەمگە ءقاۋىپ ءتوندىرىپ وتىرعان ۋاححابيزم-سالافيزم يدەولوگياسىن سىنعا العان بولاتىن. «پارتيا جەتەكشىلەرى تەك سايلاۋ مەن ارزان ابىرويدى ويلايدى» دەپ كەلگەن باسىمىز مۇحاڭنىڭ مۇنداي باتىل مالىمدەمەلەرىنە ءىشىمىز جىلىپ سالا بەردى. مۇحاڭنىڭ سول قاسيەتتەرى ەلدەگى نەگىزگى ساياسي كۇشتىڭ جۇمىسىن جانداندىرۋعا، پارتيا بەلسەندىلەرىمەن تاربيە جۇمىسىن جۇرگىزۋگە، سول ارقىلى سانعا ەمەس، ساپاعا ءمان بەرىپ، ۇيىم قىزمەتكەرلەرىنىڭ يدەووگيالىق ۇستانىمدارىنىڭ دۇرىس قالىپتاسۋىنا ىقپال ەتەدى دەگەن سەنىمدەمىز.

ەلباسىنىڭ تاپسىرماسىمەن لاڭكەستىككە، راديكالدىق ۇيىمدار قىزمەتىنە قارسى قام-قارەكەتتى بەلگىلەيتىن جەتى زاڭ جوباسىنىڭ ازىرلەنگەنىن، جاقىن كۇندەرى پارلامەنتكە جولداناتىنىن ەستىدىك. ءقاۋىپتى يدەيالارمەن كۇرەس ونىمەن تىيىلماۋى ءتيىس. تۇراقتىلىقتى بۇزۋعا نيەتتى ارامزالار بەيبىت ءومىر كەشىپ جاتقان ەل ىشىندە دە، مىڭ قۇبىلعان ساياسات ساحناسىندا دا جوق ەمەس. سوندىقتان، «نۇر وتان» دا بۇل ىسكە بىلەك سىبانا كىرىسىپ، جەر-جەرلەردە تەرىس اعىمدارعا بۇيرەگى بۇراتىن، رەتى كەلسە سولاردىڭ ءسوزىن سويلەۋگە دايىن تۇراتىن «بەلسەندىلەردىڭ» ءوز قاتارىنا ەنىپ كەتپەۋىن قاراستىرۋى، سەنىم سەرگەلدەڭىنە تۇسكەن مۇشەلەر بولسا، پارتيانىڭ قۇرىلىمدىق مۇمكىندىگىن پايدالانىپ ولاردى الاستاۋدىڭ امالىن جاساۋى قاجەت. ويتكەنى، ءتۇرلى ساياسي ينتريگالار مەن استىرتىن ويىنداردان بيىك تۇراتىن ەلباسى پارتياسى ەلدى الداعان دۇمشەلەر مەن الاياقتاردان ادا بولۋى ءتيىس.

جاستىلەك راحمەت