رەسەي كوشباسشىسى ۆلاديمير پۋتين ومىردەن وزعان وزبەكستان رەسپۋبليكاسىنىڭ تۇڭعىش پرەزيدەنتى يسلام كارىموۆتىڭ وتباسىنا كوڭىل ايتىپ، مارقۇمنىڭ ارۋاعىن ەسكە الۋ ءۇشىن وزبەك جەرىنە ارنايى ۇشىپ باردى، - دەپ حابارلايدى Qamshy.kz Baq.kz - كە سىلتەمە جاساپ.

وزبەكستانعا كەلىپ جەتكەن پۋتين الدىمەن شاحي زيندا مازارىنىڭ قاسىندا جەرلەنگەن كارىموۆتىڭ زيراتىنا بارىپ، گۇل شوعىن قويدى.

ودان بولەك، پرەزيدەنت وزبەك كوشباسشىسىنىڭ وتباسىنا – جارى تاتيانا كارىموۆاعا جانە ونىڭ كەنجە قىزى لولا كارىموۆا-تيلليايەۆاعا كوڭىل ايتىپ، قايعىسىنا ورتاقتاستى.

ءپۋتيننىڭ وزبەكستانعا كەلەتىنى جايلى تەك كەشە عانا بەلگىلى بولعان. رەسەي كوشباسشىسىنىڭ كومەكشىسى يۋريي ۋشاكوۆ جۋرناليستەرگە ونىڭ جەكە ماقساتتاعى ساپار ەكەنىن ناقتىلاپ، ءتۇسىندىردى.

ءوز كەزەگىندە، پۋتين كارىموۆپەن «دوستىق قارىم-قاتىناستا بولعانىن» ايتىپ، وزبەكستاننىڭ جاڭا بيلىگىمەن اراداعى بايلانىس سونداي كۇيدە ساقتالاتىنىنا سەنىم ءبىلدىردى.

ەستەرىڭىزگە سالا كەتەيىك، 3 قىركۇيەكتە رەسەي پرەزيدەنتىنىڭ باسپا ءسوز حاتشىسى دميتريي پەسكوۆ جۇمىس كەستەسىنىڭ تىعىزدىعىنا بايلانىستى پۋتين كارىموۆتى جەرلەۋ راسىمىنە قاتىسا المايتىنىن مالىمدەدى. سول كەزدە ۆلاديۆوستوكتا جۇرگەن ءپۋتيننىڭ تاپسىرماسىمەن كارىموۆپەن باقۇلداسۋ شاراسىندا رەسەي دەلەگاسياسىن ەلدىڭ پرەمەر-مينيسترى دميتريي مەدۆەديەۆ باستاپ باردى.