وڭىرلىك كوممۋنيكاسيالار قىزمەتىندە وتكەن بريفينگ بارىسىندا «الماتى قالاسىنىڭ وتباسىن قولداۋ ورتالىعى» كمم-نىڭ قالا تۇرعىندارىنا داعدارىستى ەڭسەرىپ، وتباسىن ساقتاۋعا قالاي كومەكتەسىپ جاتقانىنا مىسال كەلتىردى. ورتالىقتىڭ ديرەكتورى مىندەتىن اتقارۋشى اقمولجان زاريپوۆتىڭ ايتۋىنشا، ولار كومەك كورسەتىپ قانا قويماي، وتباسىلىق بايلانىستى دا قالپىنا كەلتىرىپ، ازاماتتاردىڭ ءومىر ءسۇرۋ ساپاسىن ارتتىرۋعا دا اتسالىسادى.
«ءبىزدىڭ ماقساتىمىز – وتباسىنا داعدارىستان شىعۋعا كومەكتەسىپ، ونى الەۋمەتتىك قۇندىلىق رەتىندە ساقتاۋ»، – دەيدى ول.
كورنەكتى مىسالدىڭ ءبىرى – جاڭا تۋعان نارەستەدەن باس تارتقان جاس انامەن جۇرگىزىلگەن جۇمىس. پسيحولوگيالىق قولداۋ مەن سۇيەمەلدەۋدىڭ ناتيجەسىندە ايەل رايىنان قايتىپ، بالاسىن قايتارىپ الىپ، ونى ءوز بەتىنشە تاربيەلەۋگە كىرىستى. سونىمەن قاتار، ورتالىق الەۋمەتتىك جانە مەديسينالىق ماسەلەلەردى شەشۋگە دە جاردەمدەسەدى. ماسەلەن، الماتى قالاسىنىڭ ءبىر تۇرعىنىنا كورۋ قابىلەتى بويىنشا مۇگەدەكتىك راسىمدەۋگە كومەكتەسىپ، سونىڭ ارقاسىندا ول ءتيىستى مەملەكەتتىك تولەمدەر مەن ەم الۋعا مۇمكىندىك العان.
ال باسقا جاعدايدا كوپبالالى وتباسىعا بالانىڭ مۇگەدەكتىك توبىن كۇشەيتۋگە جاردەم بەرىلىپ، بۇل مەملەكەتتىك قولداۋعا قولجەتىمدىلىكتى كەڭەيتتى. جۇمىسپەن قامتۋ باعىتى دا ماڭىزدى ورىن الادى. ورتالىقتىڭ كومەگىمەن كوپبالالى انا كۇتۋشى-تاربيەشى بولىپ جۇمىسقا ورنالاستى. الەۋمەتتىك قولايسىزدىقتىڭ الدىن الۋ – نەگىزگى باعىتتىڭ ءبىرى. ورتالىق پوليسيا، ءبىلىم بەرۋ مەن مەديسينالىق ۇيىمدارمەن بىرلەسىپ، اقپاراتتىق ناۋقاندار مەن وقىتۋ ءىس-شارالارىن دا وتكىزەدى.
«كەڭەس بەرۋدەن باستاپ سۇيەمەلدەۋگە دەيىنگى كەشەندى ءتاسىل ناتيجەدلى ەكەنىن كورىپ وتىرمىز. ادامدار ءقازىر جۇيەگە سەنىم ارتىپ، كومەككە جۇگىنىپ جاتىر»، – دەيدى سپيكەر.
