توقتار تولەشوۆ اتىراۋدا ءوتىپ جاتقان ماكس بوقايەۆ پەن تالعات ايانعا قاتىستى سوت وتىرىسىندا جاۋاپ بەردى، - دەپ حابارلايدى Qamshy.kz Tengrinews.kz – كە سىلتەمە جاساپ.

پروكۋرورلار توقتار تولەشوۆتەن استاناداعى ۋاقىتشا ۇستاۋ يزولياتورىنداعى ۆيدەو ارقىلى جاۋاپ الدى. ايتا كەتەيىك، كاسىپكەردىڭ بەرگەن جاۋاپتارى Facebook جەلىسىندە كورسەتىلدى.

توقتار تولەشوۆتىڭ ايتۋىنشا، ول ماكس بوقايەۆپەن دە، تالعات ايانمەن دە تانىس بولماعان. كاسىپكەر اقشالاردى تالعات ايانعا بىرەۋ ارقىلى بەرگەن.

"مەن ينتەرنەتتەن جەر رەفورماسى تۋرالى كەيبىر مالىمەتتەردى الدىم. بارلىق ماتەريالدى كونۆەرتكە سالىپ، نۇرعاليعا "ۆولكوۆتان 150 مىڭ دوللار الىپ، ونىڭ 100 مىڭىن جىبەر، ال 50 مىڭ تەڭگە وزىندە قالسىن. قالعانىن سوسىن ايتام" دەدىم. نۇرعالي ول اقشالاردىڭ كىمگە جىبەرىلىپ جاتقانىن، ول قانداي ماقساتتا جانە نە ءۇشىن ەكەنىن دەبىلمەدى. سودان جاڭا جىلدان سوڭ نۇرعالي ماعان كەلدى. اقشانىڭ الۋشىعا جەتكىزىلگەنىن ايتتى"، - دەدى تولەشوۆ.

"جەر ماسەلەسى. سەبەبى، قازاقتار ءوز جەرلەرى ءۇشىن سوڭىنا دەيىن بارادى. جەر ماسەلەسىنە قاتىستى حالىق اراسىنداعى شۋ مەن ولاردىڭ نارازىلىعى... بۇل كەز كەلگەن قازاق ءۇشىن جانعا تيەتىن ماسەلە. سوندىقتان دا مەن وسى ماسەلەنى قوزعاۋدى ءجون كوردىم. جانە ماعان دا شەتەلدىكتەردىڭ ءبىزدىڭ جەرىمىزدى الاتىنى جايلى اڭگىمەلەر قاتتى ۇنامادى. مەن ءقازىر دە جەرىمىزدىڭ شەتەلدىكتەردىكى بولۋىن قالامايمىن"، - دەپ جاۋاپ بەردى كاسىپكەر پروكۋروردىڭ قويعان سۇراقتارىنا.

سونىمەن قاتار، تولەشوۆ ءوزىنىڭ ۆيسە-پرەزيدەنت بولعىسى كەلگەندىكتەن وسى ميتينگتى قارجىلاندىرعانىن مويىندادى.

"بۇل مەنىڭ بەدەلىمدى كوتەرۋ ءۇشىن جاسالدى. بۇل ميتينگ مەنىڭ قوعام قايراتكەرى، قازاقستانداعى تانىمال ادامداردىڭ ءبىرى بولۋىم ءۇشىن كەرەك بولدى. ال باسقا جاعىنان الىپ قارايتىن بولساق، بۇل مەنىڭ ازاماتتىق پوزيسيام، ياعني مەن جەردىڭ شەتەلدىكتەرگە ساتىلۋىن قالامايمىن. ەگەر دە ءقازىر ەلىمىزدە ۆيسە-پرەزيدەنت دەگەن قىزمەت ەنگىزىلەتىن بولسا، مەنىڭ كانديداتۋرام قارالاتىن ەدى. مەن ۆيسە-پرەزيدەنت بولۋعا ۇمتىلدىم. ءقازىر ەندى بىلمەيمىن، ءبىراق سول ۋاقىتتا مەن ۆيسە-پرەزيدەنت بولۋدى قالادىم"، - دەدى كاسىپكەر.

ەسكە سالايىق، 24 ساۋىردە جەر ماسەلەسى بويىنشا ميتينگكە ماكس پەن تالعاتپەن قاتار مىڭداعان ادام شىققان بولاتىن. الايدا قالا اكىمدىگى ميتينگ وتكىزۋگە رەسمي تۇردە تىيىم سالعان ەدى. كەيىن - 18 مامىردا ماكس پەن تالعات، ولاردىڭ بىرنەشە جاقتاۋشىسى زاڭسىز ميتينگكە قاتىسۋعا شاقىردى دەپ قاماۋعا الىنعان بولاتىن. 24 مامىردا ايان مەن بوقايەۆقا قاتىستى سوتالدى تەرگەۋدىڭ باستالعانى بەلگىلى بولدى.  

ال 3 ماۋسىمدا اتىراۋ قالالىق №2 سوتى ماكس پەن تالعاتقا قاتىستى ەكى ايعا قاماۋعا الۋ تۇرىندەگى بۇلتارتپاۋ شاراسىن تاڭداعان بولاتىن.