32 جاستاعى جىگىت بۇعان دەيىن قارۋ قولدانىپ، بۇزاقىلىق جاساعانى ءۇشىن ءىستى بولعان. تۇرمەدە 4 جىل وتىرىپ شىققان ول بۇل جولى ادام ولتىرگەنى ءۇشىن ايىپتالۋدا. بۇل تۋرالى Qamshy.kz كەرەك.Info-عا سىلتەمە جاساپ مالىمدەيدى.

قىلمىس 11 تامىز كۇنى جاسالعان. سول كۇنى سوتتالۋشى ءتورت ادام بولىپ تاڭ اتقانشا ىشىمدىك ىشەدى. ولاردىڭ اراسىندا سوتتالۋشىنىڭ ازاماتتىق نەكەدەگى جۇبايى مەن تاعى ءبىر ايەل ادام بولادى. الايدا سوڭعىسى ۇيدەن ەرتەرەك كەتىپ قالادى. ال قالعاندارى كوڭىلدى وتىرىستى ونان ءارى جالعاستىرادى. ىشىمدىككە سىلقيا تويىپ العان سوتتالۋشى قالعىپ، ۇيىقتاي باستايدى. ال ونىڭ ايەلى مەن تانىسى ىشىمدىك ءىشىپ وتىرادى. ءبىر كەزدە تانىسى ۇيىقتاپ جاتقان ەر ادامعا قاراپ: “ايەلىڭدى مەنىڭ قاسىما قالدىرىپ، نەگە ۇيىقتاپ جاتىرسىڭ؟ ەسىم كەتسە، ونى زورلاپ تاستاۋىم مۇمكىن” دەپ ازىلدەيدى. ءتىپتى ول ۇيىقتاپ جاتقاندا ايەلىمەن ءۇش رەت جىنىستىق قاتىناس جاساعانىن دا ايتىپ سالادى. ايەل ودان بۇلاي ازىلدەمەۋىن تالاپ ەتەدى. تانىسىنىڭ ءسوزىن ەلەمەگەن ەر ادام ورنىنان تۇرىپ، تاعى دا ىشىمدىك ىشەدى. ەر ادام ازىلدەۋىن بۇدان كەيىن دە توقتاتپايدى. سوتتالۋشىعا ايەلىن قاراۋسىز قالدىرماۋىن، ايتپەسە زورلىق جاساۋى مۇمكىن ەكەندىگىن تاعى دا ەسكەرتكەن. بۇل جولى ەر ادام تانىسىمەن داۋلاسا كەتەدى. اقىرى ايەلىنىڭ سىرتقا تەمەكى شەگۋگە كەتكەن ءساتىن پايدالانىپ، مارقۇمنىڭ جۇرەك تۇسىنا پىشاق سۇعىپ الادى. مارقۇم سول جەردە قايتىس بولعان. قارعالى اۋدانى، بادامشا اۋىلىنىڭ تۇرعىنى ءقازىر سوتتا جاۋاپ بەرۋدە. قىلمىسى دالەلدەنسە، ول 8 جىلدان 15 جىلعا دەيىنگى مەرزىمگە سوتتالۋى مۇمكىن