ساپاربايەۆتىڭ سوتى باستالدى. اقتوبە وبلىسىنىڭ اكىمى ءوز قۇقىن استانا سوتىندا قورعاپ جاتىر دەپ حابارلايدى  Qamshy.kz 31 ارناعا سىلتەمە جاساپ.

بەردىبەك ماشبەك ۇلى وزىنە دالەلسىز جالا جاۋىپ، ار-نامىسىما نۇقسان كەلتىردى دەپ ازاماتتىق بەلسەندىنىڭ ۇستىنەن شاعىمدانعان بولاتىن. جەر ساتۋ ماسەلەسىنە قاتىستى ايتىلعان مالىمدەمەنىڭ قاي ءسوزى شەنەۋنىكتىڭ شامىنا ءتيدى؟ جانە مورالدىق شىعىن ەسەبىندە قانشا وتەماقى سۇراپ وتىر؟ بۇل سۇراقتارعا ساپاربايەۆ مىرزانىڭ وزىنەن جاۋاپ الۋ مۇمكىن بولمادى. ويتكەنى، ايماق باسشىسىنىڭ ورنىنا زاڭدى وكىلى كەلىپتى.

ءبىر عانا شىعىس قازاقستان وبلىسى ءۇرجار اۋدانىنا قاراستى جالپى كولەمى، اۋىل شارۋاشىلىعى ماقساتىندا پايدالاناتىن 87 مىڭ 437 گەكتار جەردى 2010 جىلدارى، سول كەزدە وبلىس باسشىسى بولعان بەردىبەك ماشبەك ۇلى ساپاربايەۆتىڭ تىكەلەي تاپسىرماسىمەن جۇڭگو ازاماتتارىنىڭ  ينۆەستيسيا سالۋ ماقساتىندا الىپ العانى انىقتالدى.

ماسەلەنىڭ ءبارى ايدىن ەگەۋبايەۆتىڭ ينتەرنەت ارقىلى جاريالاعان وسى مالىمدەمەسىنەن باستالىپ وتىر. ارتىنشا "جەردى شەتەلدىككە بەرىپ جىبەردى" دەلىنگەن ساپاربايەۆ مىرزا وزىنە جالا جاپتى دەپ سوتقا شاعىمدانعان ەدى. بۇگىن باستالعان سوت وتىرىسىنا شەنەۋنىكتىڭ ءوزى ەمەس، ادۆوكاتى كەلدى. ايتقان ءسوزى ءۇشىن ايىپتى بولعاندار ءوز پىكىرىن دالەلدەۋگە بارىن سالدى.

"جۇڭگو ازاماتتارىنىڭ 2011 جىلى 7 تامىزدا ءۇرجار اۋدانىندا تجم تىكۇشاعىمەن ەگىستىك القاپتارىنا كەلگەنى ماڭىزدى اقپارات دەپ ويلايمىن"، - دەيدى ازاماتتىق بەلسەندى  ايدىن ەگەۋبايەۆ.

"ەگەۋبايەۆ ايدىن ول جەردە تىكەلەي بەردىبەك ساپاربايەۆتىڭ تاپسىرماسى بولعانى انىقتالدى دەپ كورسەتكەن. الايدا، بۇل جەردە قىتايلار تىكۇشاقپەن ۇشا ما، ۇشاقپەن ۇشا ما، قاي جەرگە بارادى، وعان بەردىبەك ماشپەك ۇلى ساپاربايەۆتىڭ تىكەلەي ەشقانداي قاتىسى جوق دەپ سانايمىن"، - دەيدى  بەردىبەك ساپاربايەۆتىڭ وكىلى ساعادات امىرە.

ساپاربايەۆ مىرزانىڭ وكىلى كورگىسى كەلمەگەن ۆيدەو مىناۋ بولاتىن. توتەنشە جاعداي قىزمەتىنىڭ تىكۇشاعىنان ءتۇسىپ، جەر تۋرالى باياندامانى تىڭداپ تۇرعاندار - قىتايلىق كومپانيانىڭ وكىلدەرى ەكەن. وسى داۋعا سەبەپكەر بولعان مىڭداعان گەكتار جەردىڭ زاڭدى يەسى – "ءباتۋا" جاۋاپكەرشىلىگى سەرىكتەستىگىنىڭ قۇرىلتايشىلارى مۇنداي كەزدەسۋدىڭ بولعانىن راستاپ وتىر. تەك، بۇل ارىپتەستىككە ايماق باسشىلارىنىڭ ىقپالى بولمادى دەيدى.

"ساپاربايەۆتىڭ قاتىسى جوق. بىرىنشىدەن. ەكىنشىدەن "دارى-مەد" پەن "ۋەيز-گرۋپپ" ەكەۋىنىڭ بىرىككەنى، ويتكەنى سوڭىنان قۇرىلعان "ءباتۋا" كومپانياسىنا "ۋەيز-گرۋپپ" كومپانياسى قىتايدان بانك نەسيەلەرىن "ءباتۋاعا" قامتاماسىز ەتۋگە شارالار جاسادى"، - دەدى  كۋاگەر نۇرلان ءبيادىلوۆ.

دەمەك، قىتايلىق زاڭدى تۇلعالاردىڭ ۇلەسى بار كومپانيانىڭ جەردى جالعا العانى راستالدى. تالاپكەرلەر، سول كەزدەگى زاڭنامادا وعان تىيىم سالىنباعانىن العا تارتىپ وتىر.

جاۋاپ بەرۋشى تاراپ جەر كودەكسىنىڭ مىنا تارماعىن نەگىزگە الىپ وتىر. وبلىس اكىمدەرىنىڭ قۇزىرەتىن بەلگىلەيتىن قۇجاتتا، جەردى ساتۋ جانە جالداۋ شارتتارىن باقىلاۋدى جۇزەگە اسىرادى دەلىنگەن. الايدا، ساپاربايەۆ مىرزانىڭ شامىنا تيگەنى باسقا ەكەن.

"ماسەلە قۇزىرەتى شەگىندە بولىپ تۇرعان جوق قوي. "تىكەلەي تاپسىرمادا" بولىپ تۇر عوي ماسەلە. "تىكەلەي تاپسىرمانى" دالەلدەسىن. بولدى. باسقا سۇراعىم جوق"، - دەدى ساعادات امىرە.

ايتا كەتەرلىگى، اقتوبە وبلىسىنىڭ اكىمى مورالدىق وتەماقى رەتىندە 5 ميلليون تەڭگە سۇراعان ەكەن. شەنەۋنىك بۇل قارجىنى بالالار ۇيىنە اۋدارماقشى.