الماتىدا 27 جاستاعى ايەل ءوزىنىڭ 9 جاسار قىزىن ۇزاق ۋاقىت بويى ساباپ كەلگەن.
بۇل تۋرالى Qamshy.kz 24.kz ارناسىنا سىلتەمە جاساپ حابارلايدى. ءوز بالاسىن ۇرىپ-سوققان تاس باۋىر انا ۋاقىتشا وقشاۋلاۋ اباقتىسىنا قامالدى. ءىسى سوتتا قارالىپ، اتا-انا قۇقىعىنان ايىرىلۋى مۇمكىن. 9 جاسار ءبۇلدىرشىننىڭ بەت-الپەتى كوگەرىپ جۇرەتىنىن اۋەلى ۇستازدارى بايقاعان. شەشەسىنىڭ وڭدىرماي ۇراتىنىن كورشىلەرى دە راستاپ وتىر.
جالعىز باستى ايەلگە انالىق بورىشىن دۇرىس اتقارماعانى ءۇشىن بۇعان دەيىن بىرنەشە رەت ەسكەرتۋ جاسالعان. ءتىپتى اكىمشىلىك جاۋاپكەرشىلىككە دە تارتىلىپتى. ءبىراق ول قىزىن ۇرعانىن توقتاتپاعان. سوندىقتان ءتيىستى شەشىم قابىلدانىپ، ۋاقىتشا وقشاۋلاۋ اباقتىسىنا قامالدى. سالتانات ازىربەك، الماتى قالالىق ءىىد رەسمي وكىلى: - قىلمىستىق ءىس قك 140-بابىنىڭ نورمالارى بويىنشا قوزعالعان بولاتىن. ياعني وسى ازاماتشانىڭ جاساعان ىس-ارەكەتى قىلمىس بولىپ تابىلادى. ءتيىستى ساراپتامالاردى تاعايىندادىق. سونىڭ ىشىندە سوت-مەديسينالىق ساراپتاما دا بار.
ءقازىر 4-سىنىپتا وقيتىن قىز بالالارعا جەدەل جاردەم بەرۋ ورتالىعىندا ەمدەلىپ جاتىر. قۋانارلىعى، ءبۇلدىرشىندى اناسىنىڭ تۋعان-تۋىستارى ءوز قامقورلىعىنا الۋعا كەلىسىپ وتىر. مارات قاپتاعايەۆ، بالالارعا جەدەل جاردەم بەرۋ ورتالىعى باس دارىگەرىنىڭ ورىنباسارى: - قۇلاعىندا، اياقتارىندا قان ۇيىعان جەرلەرى بار. كوگەرگەن جەرلەرى بار. باسىنىڭ ميى شايقالعان. قازىرگى باقىلاۋ بارىسىندا جالپى جاعدايى جامان ەمەس، دۇرىستالىپ كەلە جاتىر.
بالا ءوز ەسىندە. بالانى ۇرىپ، تاربيەلەۋگە بولا ما؟ پسيحولوگتار بۇعان ۇزىلدى-كەسىلدى قارسى. پسيحولوگيا عىلىمدارىنىڭ دوكتورى، پروفەسسور راۋشان كارىموۆا وتباسىلىق اگرەسسيا بالانىڭ بولاشاعىنا بالتا شابۋى ابدەن مۇمكىن دەيدى. راۋشان كارىموۆا، پسيحولوگيا عىلىمدارىنىڭ دوكتورى، پروفەسسور: - جان جاراقاتى وتە اۋىر. ونى ەمدەۋ ءۇشىن ۇزاق ۋاقىت قاجەت. وتباسىندا زورلىق-زومبىلىق كورىپ، پسيحيكاسى بۇزىلعان بالالاردى ەمدەۋدىڭ ءبىر جولى – ولارعا كوبىرەك مەيىرىم شۋاعىن توگۋ. اتا-انا مەن بالا اراسىنداعى ءوزارا سەنىمدى قالپىنا كەلتىرۋ كەرەك. ءومىردىڭ كەيبىر ساتسىزدىكتەرى ءۇشىن بالادان ءوش الۋدىڭ قاجەتى جوق. قالالىق يۋۆەنالدى پوليسيا ءبولىمىنىڭ باسشىسى لەيلا الىپبايەۆانىڭ ايتۋىنشا، جىل باسىنان بەرى الماتىدا 29 اتا-انا اتا-انا قۇقىعىنان ايىرىلعان.
تاعى 115 اتا-انا ۇل-قىزدارىنا دۇرىس تاربيە بەرمەگەنى ءۇشىن اكىمشىلىك جاۋاپكەرشىلىككە تارتىلدى. جاننا تاسيروۆا، قالالىق ءبىلىم باسقارماسى قورعانشىلىق جانە قامقورشىلىق ءبولىمىنىڭ باسشىسى: - اراعىن تاستاپ، ناركوتيكالىق زاتتاردى قولدانباي، ۇرىپ–سوعۋدى دوعارامىن دەپ ءوز-وزىن تۇزەيتىن بولسا، وندا التى اي كولەمىندە قايتادان سوتقا شاعىمدانىپ ءوتىنىش بەرىپ، اتا-انا قۇقىعىن قايتادان قايتا قايتارۋىن سۇرايدى. بالا – ءومىردىڭ ءسانى، وتباسىنىڭ شاتتىعى. ال بالانىڭ باقىتتى بولۋى اناسىنىڭ ماحابباتى مەن اكەسىنىڭ مەيىرىمىنە بايلانىستى.
