تۇرىك پرەزيدەنتى ەردوعان رەسەي پرەزيدەنتى پۋتينمەن تەلەفوندا سويلەستى، دەپ حابارلايدى «قامشى» پورتالى.
ەكى ەل پرەزيدەنتى تەلەفونداعى اڭگىمەسىندە الەپپوداعى شيەلەنىستى جاعدايدى شەشۋگە جول ىزدەدى.(الەپپو – تۇرىكشە حالەپ، سيريانىڭ ءىرى قالالارىنىڭ ءبىرى جانە پروۆينسيا ورتالىعى. حالىق سانى ءۇش ميلليونعا جاۋىق الەپپو سيريانىڭ ۇلكەن قالالارىنىڭ ءبىرى جانە وسمانلى يمپەرياسى كەزىندەگى كونستانتينوپول مەن كايردەن كەيىنگى ءۇشىنشى ۇلكەن قالاسى بولدى. تۇرىك بيلىگى سوندىقتان دا ونداعى ادام تاعدىرىنا قاتتى الاڭداۋشىلىق بىلدىرەدى)
تۇرىك پرەزيدەنتى باسپا ءسوز قىزمەتى تاراتقان اقپارات بويىنشا پرەزيدەنتتەر سيرياداعى ازاماتتىق سوعىس ماسەلەسىن دە تالقىلادى.
تۇرىك قارۋلى كۇشتەرى سيرياعا كىرگەن ەۆفرات قالقانى قوزعالىسى(Fırat Kalkanı Harekatı) اياسىندا، ءال-باب ايماعىندا جۇرگىزىلگەن وپەراسيادا تۇرىك اسكەرلەرىنە قارسى شابۋىلدار جاسالعان. سوندىقتان دا پۋتين مەن ەردوعان تىزە قوسىپ ارەكەت ەتىپ، الەپپوداعى تۇرعىنداردىڭ تاعدىرىنا زارداپ كەلتىرمەي تىنىشتىق ورناتۋ ماسەلەسىن سويلەستى.
ەردوعان ەۆفرات قالقانى وپەراسياسىن باستاپ، سيرياعا اسكەر كىرگىزسە دە، سيريانىڭ تەرريتوريالىق تۇتاستىعىنا قۇرمەت كورسەتەتىنىن باسا ايتتى.
سونىمەن قاتار ەكى ليدەر ورىس-تۇرىك قاتىناسىنىڭ جاقسارا ءتۇسۋى ءۇشىن قولدان كەلگەنىنىڭ ءبارىن جاسايتىنىن دا كەڭەسكەن. بۇل ماسەلە اياسىندا تۇرىك پرەمەرى يىلدىرىم 6 جەلتوقساندا ماسكەۋگە رەسمي ىسساپارمەن بارماق. ءارى، وتكەن جىلى ۇشاق داعدارىسىنا وراي كەلمەي قالعان رەسەي فەدەراسياسىنىڭ سىرتقى ىستەر ءمينيسترى سەرگەي لاۆروۆ تا 1 جەلتوقسان كۇنى تۇركياعا بارادى. سەرگەي لاۆروۆ ورىس-تۇرىك ورتاق ستراتەگيالىق جوسپارلاۋ توبىنىڭ وتىرىسىنا قاتىسۋ ماقساتىمەن انتاليانىڭ الانيا اۋدانىنا بارادى.
وتىرىس ورىس ۇشاعى قۇلاتىلعاننان تاپ ءبىر جىلدان كەيىن ءبىرىنشى رەت ۇيىمداستىرىلادى. الانيادا ەكى جاقتى قاتىناستارمەن قوسا ايماقتىق جانە حالىقارالىق تاقىرىپتار دا قولعا الىنادى. وتىرىستا سيريانىڭ احۋالى دا اڭگىمە بولادى دەپ كۇتىلۋدە.
ايتا كەتسەك، بۇگىن قازاق پرەزيدەنتى نازاربايەۆ تا پۋتينمەن تەلەفوندا سويلەسكەن بولاتىن. اڭگىمەلەسۋ بارىسىندا نۇرسۇلتان نازاربايەۆ پەن ۆلاديمير پۋتين ەكىجاقتى ىنتىماقتاستىقتىڭ جاعدايى مەن پەرسپەكتيۆالارىن تالقىلاعان. مەملەكەتتەر باسشىلارى سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى. تەلەفون ارقىلى سويلەسۋگە رەسەي جاعى باستاماشى بولدى دەپ حابارلاعان ەدى اقوردانىڭ باسپا ءسوز قىزمەتى.
