رەسمي دەرەكتەرگە سايكەس، قازاقستاندا 15 مىڭعا جۋىق ءدىني جات اعىمداردى قولدايتىن ادامدار ءومىر سۇرەدى، دەپ حابارلادى رەسپۋبليكا پرەمەر-مينيستردىڭ ورىنباسارى يمانعالي تاسماعامبەتوۆ.  «دەراديكاليزاسيا —  بۇل مەملەكەت پەن ۇكىمەتتىك ەمەس ۇيىمداردىڭ بىرىگىپ، بارىنشا كۇش سالىپ جۇمىس جاسايتىن سالا. بۇگىندە تەك 22 قوعامدىق ۇيىم ءدىن سالاسىندا كەڭەس بەرۋ جانە وڭالتۋ كومەگىن كورسەتۋمەن اينالىسادى. بۇل جالپى ۇەۇ سانىنىڭ 0،12 پايىزى عانا. رەسمي ستاتيستيكالىق مالىمەتى بويىنشا ەلدە 15 مىڭعا جۋىق ادام ءدىني جات اعىمداردى قولدايدى»، — دەگەن  ۆيسە-پرەمەر استانادا ءوتىپ جاتقان VII ازاماتتىق فورۋمدا. 

ۆيسە-پرەمەردىڭ العا تارتقان رەسمي ستاتيستيكالىق مالىمەتى بويىنشا ەلدە 15 مىڭ جۋىق ادام ءدىني جات اعىمداردا جۇرگەنىنە قاراماستان، تەك استانا، كوكشەتاۋ، قاراعاندى، تارازدا عانا ەكىدەن كوپ ورتالىق جۇمىس جاسايدى، پەتروپاۆلدا بىردە-بىر وڭالتۋ ورتالىعى جوق. «وڭتۇستىك قازاقستان وبلىسىندا ءۇش مىڭعا جۋىق تىيىم سالىنعان ءدىني اعىمداردىڭ ءىزباسارلارى بار. الايدا، اتالعان وبلىستا تەك ءبىر عانا ۇكىمەتتىك ەمەس «نۇر-مۇرا» قب ۇيىمى ءدىن سالاسىندا كەڭەس بەرۋ جانە وڭالتۋ ماسەلەسىمەن اينالىسادى»، - دەپ مالىمدەدى تاسماعامبەتوۆ.