استانا قالاسىنىڭ اكىمى اسەت يسەكەشيەۆ ەلوردا تورىندە يننوۆاسيالىق كونگرەستە ەلوردا ءوسۋ قارقىنى بويىنشا الەمنىڭ بىرنەشە مەملەكەتىنىڭ استانالارىنان باسىپ وزعانىن ايتقان.

«استانا ءوسۋ قارقىنى بويىنشا بىرنەشە ەلدىڭ استانالارىنان وزىپ كەتتى. مىسالى، ءابۋ-دابي، ماسكەۋ، انكارا، باكۋ، ت.ب قالالاردى ايتۋعا بولادى. توقسانىنشى جىلداردىڭ باسىندا بۇل قالادا 280 مىڭ ادام بولعان. ال ءقازىر 1 ميلليونعا جەتتى. ىشكى جالپى ءونىم 18 جىلدىڭ ىشىندە 180 ەسەگە ءوستى. شاعىن جانە ورتا بيزنەستىڭ سانى 100 مىڭعا جەتتى. شەتەلدىك تۋريستەردىڭ سانى 5 مىڭنان 273 مىڭعا دەيىن ارتتى. ال قوناق ۇيلەردىڭ سانى 163 جەتتى»، – دەگەن اسەت يسەكەشيەۆ.

ايتا كەتەر بولساق، بيىلعى جىلى 21 ماۋسىمدا ينۆەستيسيالار جانە دامۋ ءمينيسترى بولعان اسەت يسەكەشيەۆ ورنىن جەڭىس قاسىمبەككە بوساتىپ، استانا قالاسىنىڭ اكىمى بولىپ تاعايىندالدى. ول اكىم بولا سالىپ، ەكى اپتا وتكەندە استانادا حالىق سانى ميلليونعا جەتتى دەپ جار سالعان بولاتىن. الايدا قوعامدا «استانادا 2016 جىلدىڭ باسىندا 871 مىڭ 200 تۇرعىن بولعانى» ايتىلىپ، جاڭا اكىمگە سەنبەستىك تانىلعان بولاتىن.

ەسكە سالساق، يسەكەشيەۆ ءبىر اي ۋاقىت بۇرىن عانا «قازىرگى تاڭدا ءبىز جاھانداعى ءىرى يننوۆاسيالىق دۋباي، لوندون، ماسكەۋ سىندى قالالارمەن جانە نuawei، ماككەنزي، ت.ب. كومپانيالارمەن تىعىز بايلانىس ورناتتىق. ونداعى ماقساتىمىز – استاناعا جاڭا تەحنولوگيالار تارتۋ. بۇل بايلانىس شەتەلدەن ينۆەستيسيا تارتۋعا مۇمكىندىك بەرەدى. الداعى ۋاقىتتا استانا حالىقارالىق قارجى ورتالىعىندا بريتانيالىق زاڭ جۇيەسىن قولداناتىن بولامىز. بۇگىندە شەتەلدىك ينۆەستورلارعا ۆيزالىق راسىمدەرگە جانە ولاردىڭ جۇمىس ىستەۋىنە جەڭىلدىك جاسايمىز. استانانى مەگاپوليسكە اينالدىرامىز»، - دەگەن بولاتىن.