گۇلسارا شالقار — 1987 جىلى قازان ايىندا دۇنيەگە كەلگەن. تاراز مەملەكەتتىك پەداگوگيكالىق ينستيتۋتىن تامامداعان. بۇگىندە استانا قالاسىندا تۇرادى.

ۇلت 
(قىرعىز ەلىنىڭ جىگىتىنە ارنالعان اق ولەڭ)

…جاقسى قىزدى جار ەتكىڭىز كەلەدى. 
ەلىڭىزگە كەلىن بولمان، سەبەبى: 
توم-تاريحتى اقتارعاندا بولاشاق 
قازاق بولىپ قالۋ كەرەك دەرەگىم. 
باستارىندا بولعاننان سوڭ بوستاندىق، 
قانشاما قىز «وزگە» جاستىق جاستاندى. 
ەل بولمايتىن «جيەندەردى» كوبەيتىپ، 
قازاعىما جاسامايمىن قاستاندىق … 
زور بىلەكتى باتىر تۋسام، قايتەمىن؟ 
جار استىندا جاسىرىنعان جاۋ بولار. 
ءدۇر جۇرەكتى حاكىم تۋسام، قايتەمىن؟ 
ەل اراسىن الشاقتاتار داۋ بولار. 
وتە بىلگىر اكىم تۋسام، قايتەمىن؟ 
قاراشادان دارا شىعىپ حان بولار. 
وتكىر ءتىلدى اقىن تۋسام، قايتەمىن؟ 
تامىرىما تارتىپ تەكتى جان بولار. 
جەز تاڭدايلى ءانشى تۋسام، قايتەمىن؟ 
ونەر، شىركىن، وزگە ۇلتقا جولدانار. 
شەبەرلەنگەن كۇيشى تۋسام، قايتەمىن؟ 
ساتقىندىقتىڭ سوراقىسى سول بولار. 
ۇرپاعىمدى سۇيگەنمەن، 
ۇلتىم ءۇشىن كۇيگەندە، 
بەلگىلى عوي جۇلدىزىمنىڭ جانباسى. 
ايەل-ەردىڭ قابىرعاسى بىلگەنگە، 
ءبىر قازاعىم «قابىرعاسىز» قالماسىن. 
ۇردىڭ قىزى كۇتىپ ءجۇر-اۋ ءسىزدى دە 
«قابىرعاڭىز» بولعاسىن. 
دوستىق تۋىن جەلبىرەتسەك… 
دوستىق ءسوزى كيەلى! 
(ادال دوس دەپ سىزگە باستى يەمىن). 
…وزگە ۇلتتا الىنباعان ءوشىم جوق، 
ءوز ۇلتىمدى «وزگەشەلەۋ» سۇيەمىن. 
سوندىقتان دا، قازاق بولسىن كۇيەۋىم!