9 جاسار كىشكەنتاي قىز وتە ۇلكەن جۇرەك پەن مەيىرىمنىڭ يەسى اقش-تىڭ سيەتل قالاسىندا تۇرعان.

ءبىر كۇنى سيەتلگە «سharity: water» قايىرىمدىلىق ۇيىمىنىڭ باسشىسى سكوتت حارريسون كەلەدى. ول لەكسياسىندا الەمدەگى كەدەي مەملەكەتتەرىندە اۋىز سۋدىڭ تاپشىلىعىنان ادامدار قالاي زارداپ شەگەتىنىن، ونىڭ ۇيىمى تازا سۋدىڭ جەتىسپەۋشىلىگىمەن كۇرەسەتىنىن ايتىپ بەرەدى. زالدىڭ ءبىر بۇرىشىندا تىڭداپ وتىرعان قىز ادامداردىڭ شالشىق پەن باتپاقتان لاس سۋدى ىشەتىنىن، سونىڭ سالدارىنان ءتۇرلى ينفەكسيا جۇقتىرىپ الاتىنىن ءبىرىنشى رەت كورىپ، تاڭعالادى. ول تەك وسى سۋدىڭ سالدارىنان كۇن سايىن 4500 بالا قايتىس بولاتىنىن ەستيدى. رەيچەل ولاردى قۇتقارۋعا شەشىم قابىلدايدى.

رەيچەل اتا-اناسىنىڭ كومەگىمەن «سharity: water» قورىنىڭ رەسمي سايتىندا ءوزىنىڭ پاراقشاسىن اشادى. جانە 9-شى تۋعان كۇنىنە ءوزىن تانيتىن دوستارىنا، تانىستارىنا سىيلىقتىڭ ورنىنا بالالاردى قۇتقارۋ ءۇشىن اقشا اۋدارۋدى وتىنەدى. 15 ادام تازا سۋعا قول جەتكىزۋ ءۇشىن وعان 300 دوللار جيناۋ كەرەك بولادى. ءبىراق جينالعان اقشا تەك 11 ادامنىڭ ءومىرىن قۇتقارۋعا عانا جەتەدى. ونىڭ كوڭىلى قاتتى ءتۇسىپ كەتەدى. تۋعان كۇنى وتكەن سوڭ ونىڭ پاراقشاسىن جاۋىپ تاستايدى.

بىرنەشە اپتا وتكەننەن كەيىن امەريكادا جان تۇرشىگەرلىك وقيعا ورىن الادى. سيەتلدەگى تاس جولدا 20 كولىك سوقتىعىسادى. ونىڭ بىرىندە رەيچەل وتباسىمەن بولادى. بۇل اپاتتا ونداعان ادامدار ءتىرى قالادى، كەيبىرى جەڭىل جاراقات الادى، الايدا بىرنەشە جەردەن ومىرتقاسى سىنعان رەيچەل عانا جان ساقتاۋ بولىمىنە تۇسەدى. دارىگەرلەر قىزدى امان الىپ قالۋ ءۇشىن ءبارىن ىستەسە دە، رەيچەل ەسىن جيماستان قايتىس بولىپ كەتەدى.

لەكسيانى جۇرگىزگەن سكوتت حارريس قايعىلى وقيعانى ەستىپ، رەيچەلدىڭ سوڭعى ءوتىنىشى بولعان پاراقشاسىن قايتادان اشادى. ول ونى كۇندە باقىلاپ وتىرادى. قوعامنىڭ نازارىن اۋدارعان وقيعادان سوڭ، اۋدارىلعان اقشانىڭ سانى ارتا باستايدى.  

رەيچەلدىڭ قايىرىمدى ارەكەتتەرى مەن قاسىرەتتى تاعدىرى امەريكالىق قوعامدا ۇلكەن رەزونانس تۋعىزدى. الەمنىڭ تۇكپىر-تۇكپىرىنەن  31 997 ادام 1 265 823 دوللار اۋدارعانى بەلگىلى بولدى. جينالعان اقشاعا كوپتەگەن افريكالىق وڭىرلەرگە سۋ جۇرگىزۋگە بولادى جانە 60 000 ادامنىڭ ءومىرىن قۇتقارۋعا بولادى. 300 دوللار جيناعىسى كەلگەن كىشكەنتاي قىزدىڭ ارمانى 40 ەسە ارتىعىمەن ورىندالدى.

بۇعان دەيىن دە رەيچەل قايىرىمدىلىق ىسپەن اينالىسىپ، ەكى رەت شاشىن ءوسىرىپ، ونى قىرقىپ، ونكولوگيالىق اۋرۋدىڭ سالدارىنان شاشى ءتۇسىپ قالعان بالالارعا جاساندى شاش رەتىندە قولدانۋعا بەرگەن ەكەن. ال رەيچەلدىڭ ولىمىنەن كەيىن دە ونىڭ اعزالارى مۇقتاج ادامدارعا بەرىلىپ، بىرنەشە ادامنىڭ ءومىرىن قۇتقارىپ قالعان.

وسىلايشا كىشكەنتاي عانا قىزدىڭ ارەكەتى مەن ءولىمى بۇكىل ادامزاتقا نەنىڭ شىن مانىندە ماڭىزدى ەكەنىن ۇعىندىرعانداي...